Həmidə Ömərova doğum gününü İranda qeyd etdi

Professional Aktyorlar Gildiyasının rəhbəri, xalq artisti Həmidə Ömərova doğum gününü İranda qeyd edir.

Buna səbəb aktrisanın Tehranda keçirilən 35-ci Beynəlxalq Fəcr Kinofestivalının münsiflər heyətində təmsil olunmasıdır.

Aprelin 21-də start götürən festival 28 aprel tarixində başa çatacaq.

Məlumat üçün bildirək ki, Həmidə Ömərova 25 aprel 1957-ci ildə Bakıda müəllim ailəsində anadan olub. 1975-1979-cu illərdə Ümumittifaq Dövlət Kinematoqrafiya İnstitutunun aktyorluq şöbəsində təhsil alıb. 1979-1993-ci illərdə "Azərbaycanfilm" kinostudiyasında, 1992-1993-ci illərdə Azərbaycan Kinematoqrafçılar İttifaqında çalışıb. Filmlərə çəkilməklə yanaşı, 500-dən artıq bədii filmin dublyajı və səsləndirilməsində fəal iştirak edib, "Azərbaycan kinosunda feminizm", "ABŞ kinosu: 1895-1945-ci illər", "Amerika kino tarixi" kitablarını qələmə alıb.

Uzun illər Azərbaycan Dövlət Televiziyasında yayımlanan "Retro" kinozalının aparıcısı olub.

O kinoda müxtəlif səpkili rollar yaradıb: "Qorxma, mən səninləyəm"də Telli, "Anlamaq istəyirəm"də Çinarə, "Nizami"də Afaq, "Burulğan"da Tamara, "Üzeyir ömrün"də Məleykə, "Qızıl uçurum" Şəfiqə və s.

Nərmin

Teleqraf.com