İsti havalarda infarkt riski arta bilər: Bu əlamətləri laqeyd yanaşmayın!

Kardioloq xəbərdarlıq edir ki, həddindən artıq isti və rütubətli hava ürəyin iş yükünü artıraraq infarkt riskini yüksəldə bilər. Xüsusilə yaşlı insanlar, xroniki xəstəliyi olanlar və ürək dərmanları qəbul edən şəxslər yay aylarında daha ehtiyatlı olmalıdırlar.

Kardiologiya üzrə mütəxəssis Özgür Mete bildirib ki, ürək-damar xəstəlikləri ölümün əsas səbəblərindən biridir və yay aylarında risk arta bilər.

Onun sözlərinə görə, isti və rütubətli havalarda infarkt halları və ürək-damar xəstəlikləri ilə əlaqəli ölüm halları artır. Bu risk xüsusilə yaşlılarda və əlavə xroniki xəstəlikləri olan şəxslərdə daha yüksəkdir.

Mütəxəssis qeyd edib ki, havanın isinməsi damarların genişlənməsinə, orqanizmdə maye və duz itkisinin artmasına, ürək döyüntülərinin sürətlənməsinə, ürəyin iş yükünün yüksəlməsinə və qanın laxtalanmaya meylinin yüksəlməsinə səbəb olur. Bu amillər risk qrupunda olan insanlarda infarkt ehtimalını artıra bilər.

Özgür Mete bildirib ki, orqanizmin istiyə qarşı əsas müdafiə mexanizmi tərləmədir. Dəridən suyun buxarlanması bədəni sərinləşdirsə də, həddindən artıq maye itkisi böyrəklərə gedən qan axınının azalmasına səbəb ola bilər. Kifayət qədər maye qəbul edilmədikdə isə qan damarlarının daralması, arterial təzyiqdə dəyişikliklər və ürək çatışmazlığı əlamətlərinin güclənməsi mümkündür.

Onun sözlərinə görə, arterial hipertenziyası və ürək çatışmazlığı olan, həmçinin sidikqovucu dərmanlar qəbul edən şəxslər isti havalarda kifayət qədər maye qəbul etməlidirlər. Əks halda böyrək funksiyalarının pozulması, arterial təzyiqin kəskin enməsi, natrium və kalium çatışmazlığı yarana bilər ki, bu da ürək ritminin pozulmasına və şüur pozğunluqlarına səbəb ola bilər.

Kardioloq daha əvvəl ürək-damar xəstəliyi diaqnozu qoyulmuş şəxslərə mümkün qədər sərin mühitdə qalmağı tövsiyə edib. O bildirib ki, sinə ağrısı, nəfəs darlığı və ya ürəkdöyünmə kimi əlamətlər yaranarsa, vaxt itirmədən tibb müəssisəsinə müraciət edilməlidir.

Mütəxəssis yay aylarında ürək-damar sağlamlığını qorumaq üçün aşağıdakı tövsiyələri verib:

* Günəş şüalarının ən intensiv olduğu saatlarda birbaşa günəş altında qalmamaq və kölgəli, sərin yerlərdə olmaq;
* Ağır fiziki yüklənmədən çəkinmək;
* Üzgüçülüklə məşğul olunacaqsa, bunu səhər tezdən və ya axşam sərinliyində təxminən 30 dəqiqə ərzində etmək;
* Yağlı və ağır qidalardan uzaq durmaq, az-az və tez-tez, əsasən tərəvəzlə zəngin qidalanmaq;
* Gün ərzində 2-2,5 litr maye qəbul etmək;
* Dənizə və ya hovuza səhər və axşam saatlarında girmək, yeməkdən dərhal sonra suya daxil olmamaq.//Demokrat.az