Azərbaycan–Avropa İttifaqı əməkdaşlığında yeni strateji mərhələ- ÖZƏL
"Müasir beynəlxalq münasibətlər sistemində baş verən geosiyasi dəyişikliklər dövlətlərarası əməkdaşlığın yeni istiqamətlərini müəyyənləşdirir. Enerji təhlükəsizliyi, regional sabitlik, nəqliyyat-kommunikasiya əlaqələrinin inkişafı və iqtisadi inteqrasiya qlobal gündəliyin əsas prioritetləri sırasındadır. Belə bir şəraitdə Azərbaycan Respublikasının həyata keçirdiyi milli maraqlara əsaslanan xarici siyasət ölkənin beynəlxalq nüfuzunun möhkəmlənməsinə, etibarlı tərəfdaş kimi mövqeyinin güclənməsinə və regional əməkdaşlıq proseslərində fəal iştirakına mühüm töhfə verir". Bunu "Olaylar"a YAP Gədəbəy Rayon Təşkilatının fəalı Anar Məmmədov deyib: "Bu baxımdan, 1 iyul 2026-cı il tarixində Bakıda Azərbaycan Respublikasının Prezidenti İlham Əliyev ilə Avropa Komissiyasının Prezidenti Ursula Fon der Lyayen arasında keçirilmiş görüş və mətbuata verilmiş bəyanatlar Azərbaycan-Avropa İttifaqı münasibətlərinin inkişafında mühüm əhəmiyyət kəsb edir. Görüş zamanı səsləndirilən fikirlər göstərdi ki, tərəflər arasında siyasi dialoq və qarşılıqlı etimad yeni mərhələyə qədəm qoymuş, əməkdaşlıq daha geniş strateji məzmun qazanmışdır.
Prezident İlham Əliyev çıxışında son illərdə Azərbaycan ilə Avropa Komissiyası arasında yüksək səviyyəli təmasların intensiv xarakter aldığını vurğulayaraq, bunun qarşılıqlı etimada və səmərəli əməkdaşlığa əsaslandığını bildirmişdir. Dövlət başçısı qeyd etmişdir ki, Avropa İttifaqı Azərbaycanın mühüm tərəfdaşlarından biridir və mövcud münasibətlər qarşılıqlı hörmət, bərabərhüquqlu əməkdaşlıq və uzunmüddətli maraqlar üzərində qurulmuşdur.
Görüş zamanı regional təhlükəsizlik və sülh məsələləri də xüsusi diqqət mərkəzində olmuşdur. Prezident İlham Əliyev Cənubi Qafqazda davamlı sülhün və sabitliyin təmin olunmasının regionun gələcək inkişafı üçün əsas şərtlərdən biri olduğunu vurğulamış, Azərbaycanın bu istiqamətdə ardıcıl və prinsipial mövqe nümayiş etdirdiyini qeyd etmişdir. Dövlət başçısı Avropa Komissiyasının regionda sülh prosesinə göstərdiyi dəstəyi də yüksək qiymətləndirmişdir.
Azərbaycanın əlverişli geostrateji mövqeyi, beynəlxalq nəqliyyat dəhlizlərində artan rolu və etibarlı tərəfdaş kimi qazandığı nüfuz Avropa İttifaqı ilə münasibətlərin inkişafına əlavə dinamizm verir. Bu əməkdaşlıq təkcə ikitərəfli əlaqələrin genişlənməsi baxımından deyil, həm də regional sabitliyin möhkəmləndirilməsi, iqtisadi əlaqələrin inkişafı və qarşılıqlı maraqlara əsaslanan tərəfdaşlığın dərinləşdirilməsi baxımından mühüm əhəmiyyət daşıyır.
Bakıda keçirilmiş görüş bir daha göstərdi ki, Azərbaycan-Avropa İttifaqı münasibətləri qarşılıqlı etimad və konstruktiv dialoq əsasında inkişaf edir. Prezident İlham Əliyevin həyata keçirdiyi müstəqil və praqmatik xarici siyasət kursu ölkəmizin beynəlxalq mövqeyini möhkəmləndirir, regional əməkdaşlığın genişlənməsinə və Cənubi Qafqazda davamlı sülhün təmin olunmasına xidmət edir. Bu baxımdan, 1 iyul 2026-cı il tarixli Bakı görüşü Azərbaycan-Avropa İttifaqı tərəfdaşlığının gələcək inkişaf istiqamətlərini müəyyənləşdirən mühüm siyasi hadisələrdən biri kimi qiymətləndirilə bilər".