Çölü xırçıltılı, içi yumşaq: Pendirli qarğıdalı çörəyi resepti

Bol ağ pendir və şüyüd ilə hazırlanan bu qarğıdalı çörəyi xırtıldayan kənarları və yumşaq içi ilə süfrələrinizə fərqli bir ləzzət qatacaq. Qızardılmış kərə yağı sayəsində klassik qarğıdalı çörəyindən daha ətirli olan bu resept həm səhər yeməkləri, həm də nahar və şam yeməkləri üçün əla alternativdir.

Milli.Az lazım olan ərzaqları təqdim edir:

2,5 stəkan qarğıdalı unu

1 stəkan tam buğda unu

125 qr kərə yağı

1 paket qabartma tozu

1 çay qaşığı soda

1 xörək qaşığı üzüm sirkəsi

2,5 stəkan isti su

1 çay qaşığı duz

1 çay qaşığı toz şəkər

200 qr ağ pendir

Yarım dəstə şüyüd

2 xörək qaşığı qarğıdalı mannası (dibinə səpmək üçün)

Hazırlanması:
Kərə yağını kiçik bir qazanda əridin. Yüngül qəhvəyi rəng alıb xoş bir ətir çıxarana qədər gözləyin və ocaqdan götürün.

Geniş bir qabda qarğıdalı unu, tam buğda unu, qabartma tozu, soda, duz və şəkəri qarışdırın.

Qızardılmış kərə yağını və sirkəni quru inqrediyentlərin üzərinə əlavə edin. Ardından isti suyu yavaş-yavaş tökərək spatula ilə qarışdırın. Qatı və homogen bir xəmir əldə edin.

İçliyi hazırlayın: Şüyüdü incə doğrayın, ağ pendiri əzərək şüyüd ilə qarışdırın.

Sobaya davamlı formanı və ya polad tavanı yağlayın, dibinə qarğıdalı mannasını səpin.

Xəmirin yarısını tavaya yayın. Üzərinə pendirli qarışımı bərabər şəkildə yayın. Qalan xəmiri də diqqətlə üzərinə əlavə edərək içliyi örtün.

Bıçaqla çörəyin üzərini dilimlənəcək şəkildə yüngülcə cızın.

Əvvəlcədən isidilmiş 190 dərəcəlik sobada üzəri qızılı rəng alana qədər təxminən 35-40 dəqiqə bişirin.

Kərə yağını nəzarətli şəkildə qızartmaq çörəyə özünəməxsus aromatik bir dad verir.

İsti suyu xəmirə hissə-hissə əlavə etmək xəmirin daha yaxşı toparlanmasını təmin edir.

Çörəyi sobadan çıxardıqdan sonra 10 dəqiqə dincəlməyə qoyun ki, dilimləyəndə dağılmasın.

Daha xırçıltılı qat üçün bişmə müddətinin son bir neçə dəqiqəsində sobanın üst rejimini işə salın.