Yardımlıda “Rəqəmsal savadlılıq, kibertəhlükəsizlik və məsuliyyətli onlayn davranış” mövzusunda tədbir keçirilib- ÖZƏL

Yardımlı Rayon İcra Hakimiyyətinin və Lənkəran-Astara regional Gənclər və İdman idarəsinin Yardımlı rayonu üzrə Gənclər və İdman Sektorunun birgə təşkilatçılığı ilə Şəhər 4 nömrəli tam orta ümumtəhsil məktəbində  gənclərin rəqəmsal bilik və bacarıqlarının artırılması, kibertəhlükələrdən qorunma yollarının təbliği və təhlükəsiz internet istifadəsinin təşviqi məqsədilə "Rəqəmsal savadlılıq, kibertəhlükəsizlik və məsuliyyətli onlayn davranış" mövzusunda maarifləndirici tədbir keçirilib. "Olaylar" xəbər verir ki, tədbirdə Yardımlı RİH-nin böyük məsləhətçisi - Uşaq hüquqlarının müdafiəsi üzrə komissiyanın məsul katibi Şakir Kərimov, RiH Başçısı aparatının Ərazi-təşkilat və ictimai-siyasi məsələlər şöbəsi, İctimai-siyasi və humanitar məsələlər sektorunun Aparıcı məsləhətçi - Uşaq hüquqlarının müdafiəsi üzrə komissiyanın məsləhətçi-psixoloqu Fikrət Qəhramanov, Lənkəran-Astara regional Gənclər və İdman idarəsinin Yardımlı rayonu üzrə Gənclər və İdman Sektorunun məsul əməkdaşları,  Şəhər 4 nömrəli tam orta ümumtəhsil məktəbinin müəllim  və şagird kollektivi iştirak ediblər.
Tədbirdə  çıxış edənlər tərəfindən iştirakçılara rəqəmsal savadlılığın müasir dövrdə əhəmiyyəti, internet resurslarından düzgün və təhlükəsiz istifadə qaydaları, şəxsi məlumatların qorunması, kibercinayətkarlığın yaratdığı təhlükələr və onlardan müdafiə üsulları barədə ətraflı məlumat verilmişdir.
Bildirilib ki, sosial şəbəkələrdən istifadə zamanı şəxsi məlumatların paylaşılmasına həssas yanaşmaq, naməlum keçidlərə daxil olmamaq, güclü və etibarlı şifrələrdən istifadə etmək, həmçinin müxtəlif elektron təhlükələrə qarşı daim diqqətli olmaq vacibdir.
Görüş zamanı məsuliyyətli onlayn davranış qaydaları da iştirakçıların diqqətinə çatdırılmışdır. Qeyd olunmuşdur ki, internet mühitində etik davranış prinsiplərinə riayət etmək, digər istifadəçilərə hörmətlə yanaşmaq, saxta məlumatların yayılmasının qarşısını almaq və rəqəmsal platformalarda qanunvericiliyin tələblərinə əməl etmək hər bir vətəndaşın əsas məsuliyyətlərindən biridir.
Tədbir çərçivəsində müəllim və şagirdlərlə qarşılıqlı fikir mübadiləsi aparılmış, iştirakçıları maraqlandıran suallar cavablandırılmış, gündəlik həyatda rast gəlinən kibertəhlükələr barədə praktiki tövsiyələr verilmişdir.
Sonda vurğulanmışdır ki, rəqəmsal dünyada təhlükəsiz və məsuliyyətli davranış cəmiyyətin informasiya təhlükəsizliyinin qorunmasında mühüm rol oynayır və bu istiqamətdə maarifləndirmə tədbirlərinin mütəmadi təşkili böyük əhəmiyyət kəsb edir.