Bakı Qadınlar Klubu Azərbaycan milli mətbəxinə aid master-klass keçdi

Mayın  13-də  artıq 31 ildir   fəaliyyət göstərən Bakı Qadınlar Klubunun  daha maraqlı bir tədbiri baş tutub. Belə ki, Azərbaycan milli mətbəxinə həsr olunmuş növbəti master-klasda   müxtəlif səfirliklərdən 29 xanım və Bakı Qadınlar Klubunun üzvləri iştirak etmişlər. Qonaqlar üçün milli mətbəximizin sevilən təamlarından biri olan qutabın hazırlanması üzrə master-klas keçirilib.  Səmimi və xoş atmosferdə keçən tədbir  görüş iştirakçılar tərəfindən böyük maraq və məmnuniyyətlə qarşılanmışdır. 
Qeyd edək ki,  klubun əsas məqsədlərindən biri sosial layihələrin həyata keçirilməsi və xeyriyyə yarmarkalarının təşkil olunmasıdır. 
Bu layihələr uşaq evlərinə dəstək, xüsusi qayğıya ehtiyacı olan uşaqlar, autizmli uşaqlar və onların anaları üçün müxtəlif tədbirlərin, master-klasların və bayram proqramlarının təşkil edilməsini əhatə edir. Eyni zamansa təşkil olunan yarmarkalardan əldə edilən vəsait uşaq evlərinə, sosial layihələrə və müxtəlif xeyriyyə məqsədlərinə yönəldilir. Beynəlxalq Qadınlar Klubunun ən önəmli missiyalarından biri isə Azərbaycanda diplomatik və mədəni dialoqun inkişafına töhfə verməkdir. Klub diplomatik korpus nümayəndələrinin xanımları, qadın diplomatlar və Azərbaycanda yaşayan xarici vətəndaşlar  üçün müxtəlif tədbirlər, mədəni proqramlar, master-klaslar və ekskursiyalar təşkil edir. Bu layihələr vasitəsilə iştirakçılar Azərbaycanın zəngin tarixi, milli mədəniyyəti, adət-ənənələri və mətbəxi ilə yaxından tanış olurlar.