Vətəndaşların rifahının qorunmasına xidmət edən sərəncam- ÖZƏL
"Azərbaycan Respublikasında sel və daşqınların yaratdığı təhlükələr son illərdə iqlim dəyişiklikləri, intensiv yağıntılar və ekoloji tarazlığın pozulması fonunda daha da aktuallaşıb. Bu baxımdan Prezident İlham Əliyev tərəfindən imzalanan "Sel və daşqınların təhlükəli və zərərli təsirlərinə qarşı mübarizə ilə bağlı əlavə tədbirlər haqqında" Sərəncam dövlətin bu sahəyə sistemli və qabaqlayıcı yanaşmasının bariz nümunəsidir". "Olaylar" xəbər veror ki, bunu Milli Məclisin deputatı Jalə Əliyeva deyib: "Sərəncamın əsas məqsədi ölkə ərazisində sel və daşqın risklərinin minimuma endirilməsi, əhalinin təhlükəsizliyinin təmin olunması və infrastrukturun qorunmasıdır. Bu sənəd yalnız fövqəladə hallara reaksiya verməklə kifayətlənmir, eyni zamanda risklərin qabaqcadan qiymətləndirilməsi və qarşısının alınması istiqamətində kompleks tədbirləri nəzərdə tutur.
Sərəncama əsasən aidiyyəti dövlət qurumlarına konkret tapşırıqlar verilib. Xüsusilə çay məcralarının təmizlənməsi, bənd və sahilbərkitmə işlərinin gücləndirilməsi, sel sularının yönləndirilməsi üçün müasir mühəndis qurğularının tikintisi prioritet istiqamətlər kimi müəyyənləşdirilib. Bu tədbirlər kənd təsərrüfatı sahələrinin, yaşayış məntəqələrinin və strateji obyektlərin qorunmasında mühüm rol oynayacaq.
Bununla yanaşı, erkən xəbərdarlıq sistemlərinin təkmilləşdirilməsi də Sərəncamın mühüm komponentlərindən biridir. Müasir texnologiyaların tətbiqi ilə meteoroloji müşahidələrin dəqiqliyinin artırılması və operativ məlumat mübadiləsinin təmin olunması mümkün təhlükələrin vaxtında aşkarlanmasına imkan verəcək. Bu isə insan itkilərinin və maddi zərərlərin qarşısının alınmasında həlledici əhəmiyyət daşıyır.
Regionlarda riskli ərazilərin xəritələşdirilməsi, əhalinin maarifləndirilməsi və fövqəladə hallara hazırlıq səviyyəsinin yüksəldilməsi bu istiqamətdə əsas prioritetlərdəndir. Əhalinin davranış qaydaları barədə məlumatlandırılması, təlimlərin keçirilməsi və operativ reaksiya mexanizmlərinin qurulması dövlət siyasətinin sosial yönümlü xarakterini bir daha nümayiş etdirir.
Maliyyə təminatı məsələsi də diqqətdən kənarda qalmayıb. Sərəncam çərçivəsində ayrılan vəsaitlər infrastruktur layihələrinin vaxtında və keyfiyyətlə icrasına şərait yaradır. Bu isə uzunmüddətli perspektivdə iqtisadi itkilərin azaldılması və dayanıqlı inkişafın təmin olunması baxımından mühüm addımdır.
Ümumilikdə, bu Sərəncam Azərbaycanın təbii fəlakətlərə qarşı mübarizə sahəsində strateji yanaşmasını əks etdirir. Burada əsas xətt yalnız nəticələrlə mübarizə deyil, səbəblərin aradan qaldırılması və risklərin idarə olunmasıdır. Bu isə ölkənin təhlükəsizlik siyasətinin mühüm tərkib hissəsi olmaqla yanaşı, vətəndaşların rifahının qorunmasına xidmət edən mühüm dövlət sənədi kimi qiymətləndirilməlidir".