Sosial media yazıları və like-ların əxlaq və məzmunla mütənasibliyi- ÖZƏL

"Müasir dövrdə sosial media platformaları insanların diqqətini ölçən əsas vasitəyə çevrilib. Like-lar, paylaşmalar və şərhlər bir yazının auditoriyada necə rezonans doğurduğunu göstərir. Lakin bu indikatorlar tez-tez elmi, təhsil və insanın ümumi rifahı üçün əhəmiyyətli olan yazılarla əxlaqa uyğun, maarifləndirici məzmuna deyil, daha çox şok, skandal və əxlaqsız məzmuna yönəlir". Bunu "Olaylar"a İqtisad elmləri doktoru, professor, Əməkdar müəllim Zahid Fərrux Məmmədov deyib: "Sosial medianın algoritmləri diqqət cəlb edən məzmunu prioritetləşdirir. Bu səbəbdən döyüş, söyüş və digər şok elementləri olan yazılar çoxlike toplayır, halbuki elm və təhsil mövzularında yazılan yazılar minimal reaksiyalar alır. Əxlaqsız, sensasionist və şok dəyəri yüksək olan yazılar milyonlarla like toplaya bilir. Fəqət elm, təhsil, əxlaq və insanın rifahını artırmağa yönəlmiş yazılar çox zaman 10-50 like ilə kifayətlənir, bəzən isə demək olar ki, görünməz qalır. İnsanların uzun, düşüncə tələb edən və faydalı məzmunla aktiv reaksiyası məhduddur( Misal: maarifləndirici videolar, elmi məqalələrin xülasəsi, sosial məsuliyyət təşviqi). 
Əxlaqi və elmi yazıların azlike alması uzunmüddətli insan inkişafına və təhsil səviyyəsinə mənfi təsir göstərə bilər. 
Sosial media platformalarında like-lar və məzmun arasında görünən düz və tərs mütənasiblik, diqqətin instinktiv və duyğusal mexanizmlərlə idarə olunduğunu göstərir. Bu, elm və təhsilin, əxlaqın sosial qiymətləndirilməsinin zəif olmasına səbəb olur. Uzunmüddətli perspektivdə isə bu vəziyyət insanın məlumatlanma səviyyəsi, etik inkişaf və rifahına mənfi təsir göstərə bilər.
Elm və təhsil məzmununu maraqlı və vizual cəhətdən cəlbedici etmək, sosial media algoritmlərini etik və maarifləndirici məzmunu təşviq edəcək şəkildə tənzimləmək və istifadəçiləri diqqət davranışları və əxlaqi meylləri barədə məlumatlandırmaq lazımdır".