Ən təhlükəli Yeni il yeməkləri: Sən də bunlardan yeyirsənsə…

Yeni il ərəfəsində süfrələrdə bolluq hökm sürsə də, bəzi ənənəvi yeməklər sağlamlıq üçün ciddi risk daşıya bilər. Qida təhlükəsizliyi üzrə ekspertlər bayram günlərində ən çox rast gəlinən zəhərlənmə səbəblərini araşdıraraq xəbərdarlıq ediblər.

Mütəxəssislərin sözlərinə görə, bayram süfrəsində risk qrupuna ilk növbədə uzun müddət açıq havada qalan və tez xarab olan yeməklər daxildir. Tibbi ekspert, allergoloq-immunoloq Andrey Prodeus bildirib ki, xüsusilə ağır souslarla hazırlanmış salatlar yüksək mikrobioloji aktivliklə seçilir:

"Mayonezli və südlü souslarla ədviyyatlanan salatlar soyuducudan çıxarıldıqdan bir neçə saat sonra təhlükəli ola bilər. Onların tərkibindəki yumurta və süd məhsulları bakteriyaların çoxalması üçün ideal şərait yaradır".

Şirniyyat və kremli tortlara xüsusi diqqət

Araşdırmaya əsasən, Yeni ildə ən çox zəhərlənmə halları kremli tortlar, qaymaq əsaslı desertlər və qatı südlü xəmir məmulatları ilə bağlı olur. Mütəxəssis qeyd edir ki, belə məhsullar temperatur dəyişikliklərinə qarşı daha həssasdır və tez xarab olur:

"Bayram zamanı desertlər süfrədə uzun müddət saxlanır, çox vaxt bir neçə dəfə soyuducuya qoyulub çıxarılır. Bu isə onların təhlükəsizliyini minimuma endirir", - ekspert bildirir.

Ət və balıq yeməkləri:

Qida təhlükəsizliyi mütəxəssisləri qeyd edirlər ki, ikinci ən təhlükəli qida qrupu ət, quş əti, balıq yeməkləri və kürüdür. Xüsusilə isti məkanda saxlanılan bu cür məhsullar bakteriya çoxalması üçün əlverişli şərait yaradır.

Bundan əlavə, bayram süfrəsində tez-tez bir neçə saat ərzində təkrar-təkrar qızdırılan yeməklər də risk faktoru hesab olunur.

Tərəvəz salatları düşündüyünüz qədər təhlükəsiz deyil

Çoxları üçün ən təhlükəsiz görünən göyərti və tərəvəz salatları da əslində potensial risk daşıyır. Həkimlər bildirirlər ki, yuyulsa belə, salatlarda mikroorqanizmlərin qalma ehtimalı yüksəkdir:

"Tərəvəz salatları bayram süfrəsində günlərlə qala bilər. Növbəti dəfə yeyərkən yumaq çoxları üçün çətin olduğundan bakteriyalar sürətlə çoxalır və bu da zəhərlənmə riskini artırır".

Alkoqol - gözardı edilən əsas risk

Həkimlərin qeyd etdiyi digər təhlükə mənbəyi isə həddindən artıq spirtli içki qəbuludur. Alkoqolun həm həzm sisteminə, həm qaraciyərə zərər verdiyi, həm də digər təhlükəli qidaların təsirini gücləndirdiyi vurğulanır.

Həkim tövsiyələri:

Bayram günlərində zəhərlənmədən qorunmaq üçün mütəxəssislər aşağıdakıları tövsiyə edir:

Salatları süfrəyə çıxarmazdan bir qədər əvvəl hazırlamaq

Mayonez və qaymaq tərkibli yeməkləri uzun müddət isti məkanda saxlamamaq

Ət və balıq yeməklərini 2 saatdan artıq otaq temperaturunda saxlamaqdan çəkinmək

Desertləri yalnız soyuducuda saxlamaq

Göyərti və tərəvəzləri istehlakdan dərhal əvvəl yumaq

Alkoqollu içkilərdən ölçülü şəkildə istifadə etmək

Ekspertlər bildirirlər ki, sadə qaydalara əməl etməklə Yeni il süfrəsi həm zəngin, həm də təhlükəsiz ola bilər. (Yeni Sabah)