Qarabağ Universitetinin müəllimi “Smart Wand – Sizin yolunuz, Sizin istiqamətiniz!” adlı layihəsini təqdim edib

Olaylar.az xəbər verir ki, 06 oktyabr 2025-ci il tarixində Azərbaycan Respublikasının Gənclər Fondunun binasında "Smart Wand - Sizin yolunuz, Sizin istiqamətiniz!" adlı layihənin ilkin təqdimatı keçirilib. Layihənin müəllifi, Qarabağ Universitetinin Mühəndislik fakültəsinin müəllimi, fizika üzrə fəlsəfə doktoru Orxan Güləhmədov, təqdimat zamanı layihənin konsepsiyası, məqsədləri, texnoloji həlli və gələcək inkişaf planları barədə ətraflı məlumat verib.

Layihə Azərbaycan Respublikasının Gənclər Fondunun "Rəqəmsal" mövzulu qrant müsabiqəsi çərçivəsində dəstəklənir və rəqəmsal texnologiyaların sosial inklüzivlik sahəsində tətbiqinə yönəlib.

Smart Wand - görmə və eşitmə məhdudiyyətli, eləcə də yaşlı şəxslərin gündəlik həyatını asanlaşdırmaq, onların müstəqilliyini və təhlükəsizliyini artırmaq məqsədilə hazırlanmış ağıllı əsa və mobil tətbiqdən ibarət sistemdir. Qurğu GPS naviqasiya, maneə aşkarlanması, təhlükəsizlik siqnalları və məsul şəxslərə real vaxt bildirişləri funksiyaları ilə təchiz olunub.

Eyni zamanda, layihənin veb saytı və mobil tətbiqi artıq hazırlanaraq uğurlu sınaqlardan keçirilib. Layihənin növbəti mərhələsində prototipin tam texniki sınaqları və istifadəyə hazırlanması planlaşdırılır.