Zarafat-zarafat altmışa  çatdın...

Vahid Əziz

Qohumum, etibarlı dostum İlham İsmayılovun 60 yaşına

Səni şux saxlayan güclü bir inam, 
zəhmətlə gecəni-gündüzə qatdın, 
doğmam, xalam oğlu, qardaşım İlham, 
zarafat-zarafat Altmışa  çatdın. 

Hər kəsin qisməti var bu dünyada, 
Ömrü mərd yaşayan sayğıyla getdi, 
həyata baxışın ciddi olsa da-
səninlə çoxları "zarafat" etdi. 

Göylərə inandın, bir də torpağa, 
naməhrəm işlərə tamah salmadın. 
Zarafat sözünü aldım dırnağa -
çünki sən onları saya salmadın. 

Həyat bir sahilsiz, tufanlı ümman, 
vicdan qayığında qolların avar, 
Vətənin- yan ala bildiyin liman, 
Üstəlik sevdiyin Türk Dünyası var. 

Var olsun ömrünə gələn yeni il, 
gözləri - insanın qəlb aynasıdır. 
Altmiş yaş - qocalıq kandarı deyil, 
ikinci gəncliyin astanasıdır.. 

Səni şux saxlayan güclü bir inam-
zəhmətlə həyatda qalxdın, ucaldın, 
Özüm şahidiyəm, qardaşım İlham, 
mərdliklə hər yerdə qələbə çaldın... 
                                         01.05.2025