Bakıda böyük konsertə hazırlaşan xarici müğənni ermənidir? - 600-ə bilet tapılmır...
Aydın Xan Əbilov: "Bu şəxsin ölkəmizdə konsert verməsi insanlarda qıcığa səbəb ola bilər"
Məlum olduğu kimi, erməniəsilli müğənni Aleksey Çumakov aprelin 20-də paytaxtda konsert verməyə hazırlaşır. Bilet qiymətləri isə 50-600 manat arasında dəyişir.
Xatırladaq ki, Aleksey Çumakov 1981-ci ildə Özbəkistanın Səmərqənd şəhərində doğulub. Müsahibələrində dəfələrlə atasının bolqar, anasının isə Qarabağ ermənisi olduğunu bildirib. O, hər zaman erməni kimliyini vurğulamaqdan çəkinmir, erməni mədəniyyətini, mətbəxini təbliğ edir. Adıçəkilən şəxs sosial media hesablarında və müsahibələrində erməni mətbəxini, erməni mədəniyyətini təbliğ edir. Görəsən, erməni kimliyini açıq-aşkar vurğulayan bu müğənni Bakıda necə qarşılanacaq? Ümumiyyətlə, özünü erməni sayan və bunu gizlətməyən şəxsin Bakıda konsertinin təşkil edilməsi nə dərəcədə düzgündür?
"Aleksey Çumakov və digərlərinin ölkəmizə gəliş-gedişində heç bir problem yoxdur, onlar ölkəmizlə bağlı qara piar aparmadıqca konsert də verə bilərlər"
Yeni Yazarlar və Sənətçilər İctimai Birliyinin sədri, yazıçı-kulturoloq Aydın Xan Əbilov "Bakı-Xəbər"ə açıqlamasında qeyd etdi ki, tarixən Azərbaycan qonşu xalqlardan nəyisə alıb, nəyisə verib. Bu istər ədəbiyyat, istərsə incəsənət, musiqi, mətbəx və digər sahələrdə dünya kulturoloqlarının diqqətini cəlb edib: "Hətta ərəb, fars, yunan mənbələrində biz bunu dəfələrlə oxumuşuq. Midiya mədəniyyəti, zərdüştlük, atəşpərəstlik kimi möhtəşəm kitablar ortaya qoyan Azərbaycan islam, xristian dünyasının qovuşduğu bir məkan olub. 2020-ci ildə Azərbaycanın möhtəşəm qələbəsi nəinki Azərbaycanla Ermənistan arasında, eləcə də Qafqazda, regionda çox maraqlı proseslərin getməsinə səbəb oldu. Ölkə başçısı İlham Əliyevin vurğuladığı kimi, artıq Azərbaycan həm Qafqazda, həm də regionda üçlük, altlıq, türk dünyası, Qafqaz ölkələrinin birliyinə səy göstərir. Biz bunu Gürcüstanda reallaşdırdıq, Ermənistana da təklif etdik, ancaq onlar hələ də bizim dinc təklifimizə hazır deyil, bu da onlarda iqtisadi-sosial böhranların artmasına səbəb olur".
Həmsöhbətimizin sözlərinə görə, Azərbaycan bütün xalqlar üçün inklüziv və multikultural mərkəz olaraq tanınır: "Aleksey Çumakov və digərlərinin ölkəmizə gəliş-gedişində heç bir problem yoxdur. Onlar ölkəmizlə bağlı qara piar aparmadıqca konsert də verə bilərlər. Aleksey Çumakov Qarabağ ermənisi olduğunu etiraf edib, bu şəxs Azərbaycana qarşı təxribatla məşğul olmadığı üçün onun ölkəmizə gəlişi qadağan oluna bilməz. Sadəcə, o öz etnik mənsubiyyətini ortaya qoyur. Təbii ki, bu şəxsin ölkəmizdə konsert verməsi insanlarda qıcığa səbəb ola bilər. Qarabağ müharibəsi zamanı bizim çoxlu sayda şəhidlərimiz oldu, qazilərimiz var. Vətən müharibəsində iştirak edib, psixoloji sarsıntı keçirənlər az deyil. Azərbaycan cəmiyyəti bu kimi hadisələrə həssasdır. Belə bir məqamda Aleksey Çumakovun konsert verməsi birmənalı qarşılana bilməz. Buna qarşı hansısa reaksiyanın olması da normaldır. Ancaq reaksiyanı da kəskinləşdirmək düzgün deyil. Çünki sərt münasibətə görə dünyada bizə münasibət dəyişə bilər. Məlumdur ki, ermənilər Azərbaycan mədəniyyətinin izlərini silməyə çalışır. Buna görə onlar dünyada xəstə cəmiyyət kimi tanınır. Erməni əsilli olduğunu deyən şəxs Azərbaycana qarşı çıxmırsa, etnik fikirlər səsləndirmirsə onun ölkəmizdə konsert verməsinə heç kim etiraz edə bilməz. Əgər həmin şəxs konsert zamanı ölkəmiz haqqında qara piar aparsa, o zaman onunla bağlı tədbir görülə bilər".