Azərbaycanda kiberdələduzluq qurbanlarının sayı sürətlə artır - Həll yolu nədir?

Son günlər şəbəkədə kiberdələduzluq hallarının çoxaldığı, yeni formada kiber təhdidlərin artdığı  müşahidə edilir. Kiberdələduzlar  videozənglər vasitəsilə tanınmışları  şantaj edir, bank kartlarının məlumatları müxtəlif üsullara ələ keçirilir, vətəndaşın tanıya biləcəyi nömrələrdən zəng etmək imkanı verən müxtəlif proqram təminatlarından istifadə edərək  zənglər edilməklə məlumatlar ələ keçirilir.

Olaylar.az xəbər verir ki, bununla bağlı Azərbaycan İnternet Formunun rəhbəri Osman Gündüz deyib ki,  vətəndaşların, dövlət və qeyri-dövlət sektorun informasiya təhlükəsizliyinin qorunması istiqamətində bu günlərdə daha aktivlik müşahidə olunmalı idi:

"Baş verənlərlə bağlı vətəndaşlara qabaqlayıcı mesajların verilməsi, kibertəhlükəsizliklə bağlı profilaktiki tədbirlərin görülməsi, kiberdələduzluq halı baş verdikdən sonra atılacaq addımlar haqqında vətəndaşların məlumatlanmasına ehtiyac var. Ümumiyyətlə, ölkədə rəqəmsal savadlılıqla bağlı ciddi problemlər mövcuddur. 

Qeyri-dövlət sektorunda əsas səlahiyyətli qurum  Nəqliyyat, Rabitə və Yüksək Texnologiyalar Nazirliyi yanında Elektron Təhlükəsizlik Xidmətidir. Son günlərdəki kiberdələduzluqlarla bağlı bu qurum tərəfindən hansı tövsiyyələrin verilməsini nəzərdən keçirəndə, rəsmi saytlarında axırıncı xəbərdarlıq-tövsiyyə məlumatının 5 ay öncə yerləşdirildiyini görmək olar".

Ekspert qeyd edib ki, sözügedən qurum profilaktika, maarifləndrimə, metodiki-informasiya dəstəyi çərçivəsində işləri gücləndirilməlidir:

"Hökumət bütövlükdə əhalinin rəqəmsal savadlılığının artırılması istiqamətdə kompleks tədbirlər müəyyən etməlidir. Rəqəmsal transformasiya ilə bağlı konseptual sənədlərin qəbulunu sürətləndirmək lazımdır".