Müsabiqənin qalibləri bəlli oldu

Müsabiqənin qalibləri bəlli oldu

Paytaxt məktəbliləri arasında keçirilən "Azərbaycan ədəbiyyatında İmadəddin Nəsimi irsi" adlı müsabiqənin qalibləri bəlli olub. "OLAYLAR"-a Bakı Şəhəri üzrə Təhsil İdarəsindən daxil olan məlumata görə,  müsabiqənin final mərhələsinin nəticələrinə əsasən, 80 nömrəli tam orta məktəbin şagirdi Nurlan Cəbrayılzadə I, 125 nömrəli tam orta məktəbin şagirdi Rauf Muradlı və 110 nömrəli tam orta məktəbin şagirdi Qüdrət Hacızadə II, 92 nömrəli tam orta məktəbin şagirdi Ləman Sadıxova, 76 nömrəli tam orta məktəbin şagirdi Daniil Borisov və 309 nömrəli tam orta məktəbin şagirdi Sərtac Ələkpərov III yerə layiq görülüb. Həmçinin 139, 46, 189-190, 181, 99, 283, 210, 322 və 231 nömrəli ümumi təhsil müəssisələrinin şagirdləri həvəsləndirici yerə layiq görülüb.

Qeyd edək ki, müsabiqənin final mərhələsində 51 məktəbli münsiflər heyəti qarşısında tədqiqat mövzuları üzrə çıxış edib. Səsləndirilən fikir və ideyaların mövzuya uyğunluğu, jest və mimikalardan məqsədyönlü istifadə edilməsi, nitqin aydınlığı, düzgünlüyü və təqdimat üçün ayrılmış vaxta riayət edilməsi meyarları əsas götürülərək məktəblilər 4 ballıq sistem üzrə qiymətləndiriliblər.

Müsabiqə qalibləri BŞTİ tərəfindən diplom və hədiyyələrlə mükafatlandırılacaq.