Ekoturizmlə bağlı keçirilən müsabiqə yekunlaşıb
Ekoturizmlə bağlı keçirilən müsabiqə yekunlaşıb
Göygölün 880 illiyi münasibətilə Ekologiya və Təbii Sərvətlər Nazirliyinin sosial şəbəkə səhifəsində elan edilmiş müsabiqə başa çatıb.
Olaylar.az xəbər verir ki, bunu nazirliyin şöbə müdiri Səyyarə Məmmədova "Azərbaycanın milli parklarında ekoturizm fəaliyyəti" mövzusunda keçirilən dəyirmi masada deyib.
O qeyd edib ki, müsabiqə iştirakçılarına beş gün ərzində hər gün bir sual ünvanlanıb. "Suallar milli parklar və "Qırmızı kitab"a düşən növlər haqqında məlumatları əhatə edib. Suallara düzgün cavab verən ilk iki nəfər qalib hesab olunub. Bu həftənin sonunda hər bir qalib 1 tanışı ilə birlikdə Göygöl Milli Parkına səfər edəcək".
S.Məmmədova bildirib ki, müsabiqənin keçirilməsində məqsəd insanlarda milli parklara maraq yaratmaq, onların bu sahədə məlumatlılığını artırmaq olub. "Müraciət edənlərin əksəriyyəti suallara düzgün cavab verib. Bu, sevindirici haldır. İstərdik ki, insanların təbiətə, milli parklara olan sevgisi daha da artsın və həftəsonları nə edəcəklərini düşünmədən milli parklarımıza üz tutsunlar. Çünki təbiət bütün fəsillərdə gözəldir".