Radikal dini cərəyanlarla bağlı layihəyə yekun vurulub

Radikal dini cərəyanlarla bağlı layihəyə yekun vurulub

"Qadın Liderliyi Uğrunda" İctimai Birliyi Azərbaycan Respublikasının Prezidenti yanında Qeyri-Hökumət Təşkilatlarına Dövlət Dəstəyi Şurasının maliyyə dəstəyi ilə həyata keçirdiyi "Qadınların radikal dini cərəyanlar barədə maarifləndirilməsi mövzusunda tədbirlərin təşkili" layihəsinə yekun vurub. İctimai Birlikdən "Olaylar"a bildirilib ki, layihə çərçivəsində Bakı və Gəncə şəhərlərində, eləcə də Abşeron rayonunda  "Radikal dini cərəyanlar: Qadınları onların təsirlərindən necə qorumalı?" mövzusunda ictimai müzakirələr keçirilib. Bu müzakirələrdə hədəf qrupunda olan qadınlar, eləcə də, ölkə ictimaiyyətinin nüfuzlu nümayəndələri, dövlət və dini qurumların təmsilçiləri, millət vəkilləri, QHT rəhbərləri, jurnalistlər və digərləri iştirak edib. Tədbirlərdə layihənin ekspertləri auditoriya ilə ölkəmizin milli təhlükəsizliyinə təhdid olan radikal dini cərəyanlar və onların təsirlərindən qorunmaq istiqamətində maarifləndirici söhbətlər aparıblar. Bu tədbirlər auditoriyalarla interaktiv debatlar şəklində keçirilib. 

Layihə çərçivəsində mövzu ilə bağlı məktəblilər arasında inşa və rəsm müsabiqəsi keçirilib. Ümumilikdə müsabiqəyə respublikanın müxtəlif guşələrindən 52 şagird (34-ü inşa, 18-i isə rəsmlə) qatılıb. Onların müsabiqəyə təqdim etdiyi inşa və rəsmlər ekspertlər tərəfindən 10 ballıq sistem üzrə qiymətləndirilib. Ən çox bal toplayan dörd iştirakçı (2 nəfər inşa, 2 nəfər rəsm üzrə) müsabiqənin qalibi elan edilib. Onlara müvafiq diplom və hədiyyələr təqdim olunub. Layihə çərçivəsində həmçinin "Qadınlar radikal dini cərəyanlara qarşı" adlı Facebook səhifəsi yaradılıb. Bu tədbirlərdə səslənən fikir və təkliflər KİV və sosial mediada ətraflı işıqlandırılıb.