Ayxan Hacızadə: “Naxçıvan Muxtar Respublikasında İdarə ləğv edilməyib”
XİN-in Naxçıvan Muxtar Respublikasında İdarəsi ləğv edilməyib.
Bunu Olaylar.az-a Azərbaycan Xarici İşlər Nazirliyinin Mətbuat Xidməti İdarəsinin rəisi Ayxan Hacızadə bildirib.
A.Hacızadə qeyd edib ki, Azərbaycan Respublikası Prezidentinin 5 may 2025-ci il tarixli 383 nömrəli Fərmanı ilə Azərbaycan Respublikasının Xarici İşlər Nazirliyi haqqında yeni Əsasnamə və XİN-in yeni strukturu təsdiq olunub.
"Təsdiq edilmiş struktura əsasən, XİN-in Naxçıvan Muxtar Respublikasında idarəsi Nazirliyin Aparatına daxil edilib. Beləliklə, XİN-in Naxçıvan Muxtar Respublikasında İdarəsi ləğv edilməyib, sadəcə digər idarələr kimi Nazirliyin Aparatının struktur bölməsi kimi müəyyən edilib", - deyə Ayxan Hacızadə bildirib.
Qeyd edək ki, bir sıra saytlarda Xarici İşlər Nazirliyinin Naxçıvan Muxtar Respublikasında İdarəsinin ləğv edilməsi ilə bağlı xəbərlər yayılıb.