Əli–Ramiz, Ramiz–Əli “sevgisi” hansı gizli məhəbbətdən qaynaqlanır?
Antimilli Şuranın şüursuz addımlarının nəticələri artıq üzə çıxır. Düzdür, biz bu şüursuzların xəyanət iplərinin gizlinlərinin hara uzandığını çoxdan bilirdik. Milyarderlər ittifaqını ortaya atan, həmişə Qərb bayrağına bürünən bu siyasi "körpələri" yolundan kim döndərdi bax, bu ciddi bir sualdır.
Bir haşiyə çıxım: Milli Şura " Milyarderlər İttifaqı" yaranmazdan öncə "Landmark" hotelində müxalifətlə Qərb nümayəndələrinin görüşü baş tutmuşdu. 2013- cü il seçkilərindən və "Milyarderlər İttifaqı" yaranmamışdan öncə təsadüfən liftə bir neçə müxalifət nümayəndəsi və dırnaq-arası "liderləri" ilə birlikdə mindik. Orada onlardan biri qayıdıb dedi ki: "Qərbdən heç nə çıxmadı, biz istiqaməti dəyişək, bütün gücümüz ilə şimala doğru gedək".
Əslində, üstündən neçə illər keçib və mən bu hadisənin, həmçinin bunun kimi minlərlə hadisənin şahidi olmuşam. Lakin heç vaxt bu məsələləri heç kimlə bölüşməmişəm. Və elə məsələlər var ki, o dünyaya qədər mənimlə gedəcək. Amma burada sadaladığım məsələlər kifayət qədər müzakirə olunub. Şimalın layihəsi olan bu şüursuz "şura" haqqında sübutlar siyasi meydanda yetərincə isbat olunub.
Bu gün bəlli olur ki, Ramiz Mehdiyevlə Əli Kərimlinin siyasi mifləri və gizli əlaqələr narrativi hardan qaynaqlanır, hansı dövlətlərin və kimlərin marağında olub indi açılır. Nəzərinizə çatdırım ki, Landmarkın o liftində bizimlə olanlardan biri də Əli Kərimli idi. Amma orada olanların hamısı sağdır. Lakin fiziki olaraq sağdılar, siyasi olaraq özlərini ölümə məhkum etdilər.
Mehdiyevin, Kərimlinin və digərlərinin bu riyakar oyunlarında, gizli əlaqələrində dərin və uzunmüddətli dövlətə düşmənçilik, siyasi destruktiv xəttin işırtıları hələ o illərdən görünürdü. Lakin Ramiz Mehdiyevin hakimiyyətdəki dayaqları və mövqeləri məqsədli şəkildə zəifləməyə başlayanda, əvvəlcədən əkilən xəyanət ağacları cəmiyyəti və dövləti zəhərləmək üçün karbon qazı kimi çoxalmağa başladı. Dövlətin siyasi, iqtisadi, mənəvi və milli imicinə zərbə vurmağa çalışanlar arasındakı xəyanət telləri çoxdan bir-birinə bağlıydı. Lakin dövləti idarə edən müdrik insanlar bütün məsələləri təmkinlə, dövlətin mövcud mövqelərinə zərər dəymədən, diplomatik və düşünülmüş şəkildə nizamlamaq üçün prosesi bu formada aparmağa üstünlük verdilər məncə. Həm də bu, siyasi psixologiya, kiminalogiya və dövlət təhlükəsizliyi sahələrinin kəsişməsində ortaya çıxan bir hadisədir. Bu gizli əlaqələrə əl atanlar maddi maraqlara görə dövləti satanlar, xarici qurumlarla gizli əməkdaşlıq edənlər, hakimiyyətə gəlmək üçün dövlətin siyasi dayaqlarını dağıtmağa çalışanlar, millətin mənəvi dəyərlərini məhv etməyə çalışanlardır. Daxili və xarici təsirlərin təsiri altında sabitliyi pozmaq üçün planlar quranlar əvvəldən də bilirdilər ki, özlərini müdafiə üçün bütün vasitələrdən istifadə edəcəklər. Lakin bu, psixologiyada "kognitiv dissonans" kimi də qiymətləndirilə biləcək bir durumdur. Dövləti və dövlətçilik prinsiplərini hər şeydən üstün tutan, Hakimiyyətin ən alisi, cənab Prezident başda olmaqla Şanlı Azərbaycanın qürurunu qoruyan bütün şəxslərə təşəkkürümü bildirirəm.
Ramil Hüseynov
"Yeni Xətt" Siyasi Tədqiqatlar Mərkəzinin rəhbəri