Vətən anlayışı bizim üçün müqəddəs olub və dərin məna kəsb edir- ÖZƏL

Dünyada baş verən müharibələr, davam edən geosiyasi və geoiqtisadi proseslər göstərir ki, gücsüz oldun müstəqiliyin təhlükə altına düşür. Xüsusilə qeyri sabit bölgə olan Cənubi Qafqazda sabitlik yaratmaq, davamlı təhlükəsizliyi qoruyub saxlamaq üçün peşəkar ordu  çox zəruridir.

Düşünürəm ki, Azərbaycan bu missiyanı çox uğurla yerinə yetirdi. Modern ordu quruculuğu, qardaş Türkiyə ilə bigə hərbi təlimlərin davamlı həyata keçirilməsi, ən yeni silahların alınıb ölkəmizə gətirilməsi, bütün hərbi hissələrdə təchizat sisteminin lazımı şəkildə təmin edilməsi hədəflər sırasında olub. Azərbaycan Ordusunun peşəkarlığı nəticəsində biz millət olaraq öz ərazi bütövlüyümüzü bərpa etdik.
   
Ordumuzun keçdiyi döyüş yolunun zirvəsində möhtəşəm Qarabağ Zəfəri dayanır. Azərbaycanın milli maraqlarına hesablanmış düzgün siyasət, dünyada və regionda gedən proseslərin çox ustalıqla nəzərə alınması və digər məqamlar tarixi qələbəmizi şərtləndirən amillərdir.

Böyük Mustafa Kamal Atatürk deyirdi ki, məcbur olmadıqda müharibə etmək insanlığa qarşı cinayət törətməkdir. Reallıq budur ki, Ermənistan havadarlarının köməyi ilə vaxtılə bu cinayəti törətmişdi. Cinayətkarı cəzalandırmaq isə beynəlxalq hüququn mühüm prinsiplərindən biri olmaqla yanaşı, Azərbaycan xalqının haqlı tələbi idi. Məhz İkinci Qarabağ müharibəsi bu zərurətdən başlamalı idi və başladı.  Gerçəkdən Azərbaycan tarixini Ali Baş Komandan İlham Əliyevin rəhbərliyi ilə Azərbaycan əsgəri yazdı.

Məşhur filosof Fridrix Nitşe deyib: "Şəxsiyyətləri tarix yaratmır, şəxsiyyətlər tarixi yaradır". Gerçəkdən 44 günlük  Vətən müharibəsində şəhidlərimiz, qazilərimiz sözün əsl mənasında tarix yaratdılar.

Bütün bunlar çağdaş tarixşünaslıqda öyrəniləsi və qürur duyulası məqamdır. Ordumuzun şərəfli döyüş yolu gələcək nəsillər üçün örnəkdir. 
 
Bu gün biz necə qürur  hissi keçiririksə, şəhidlərimizin  ruhu da eləcə şaddır. Artıq  onların böyük  şücaət göstərdiyi, canlarını fəda etdiyi torpaqlarımız azaddır. 

Şəhidlərimizi ehtiramla  anırıq. Əziz, qəhrəman qardaşlarımız, Siz qalib gəldiniz! Qazandığınız qələbəni Azərbaycana halal edin! Sizin misilsiz qəhrəmanlığınız hesabına beli bükülmüş ruhumuza rahatlıq gəldi. Azərbaycanın tək  torpağı deyil, həm də qüruru özünə qayıtdı.  Ona görə, hər zaman deyirik və yazırıq şəhidlər ölməz, Vətən bölünməz! 

Əkrəm Bəydəmirli

Siyasi ekspert