Avrasiyanın iqtisadi xəritəsini dəyişən Azərbaycan–Qazaxıstan təşəbbüsü- ÖZƏL
"Son illərdə Azərbaycan və Qazaxıstanın təşəbbüsü ilə həyata keçirilən "Orta Dəhliz" layihəsi təkcə iki ölkənin deyil, bütün Avrasiya məkanının iqtisadi inkişaf modelini yenidən formalaşdırır. Prezident İlham Əliyevin "Kazinform" agentliyinə müsahibəsində qeyd etdiyi kimi, bu nəqliyyat marşrutu Avropa ilə Asiyanı birləşdirən ən səmərəli ticarət xəttinə çevrilib. Azərbaycan üzərindən 2024-cü ildə 3,5 milyon ton yük daşınıb və bu rəqəm ildən-ilə artır. "Orta Dəhliz" layihəsi ölkələrimizin strateji tərəfdaşlığını möhkəmləndirməklə yanaşı, regionun geosiyasi sabitliyinə və iqtisadi inteqrasiyasına da real töhfə verir". "Olaylar" xəbər verir ki, bunu YAP Şuşa rayon təşkilatının 39 nömrəli ərazi partiya təşkilatının sədri müavini Rafiq Kalbalıyev deyib: "Bu əməkdaşlıqda Azərbaycan tranzit mərkəzi kimi, Qazaxıstan isə resurs və istehsal potensialı baxımından mühüm rol oynayır. İki ölkənin nəqliyyat infrastrukturunun bir-birini tamamlaması "Aktau-Ceyhan" marşrutunun inkişafına və Xəzər dənizi üzərindən yeni əlaqə xətlərinin qurulmasına imkan yaradır. Bunun nəticəsində Asiyadan Avropaya daşınan yüklər üçün Azərbaycan ərazisi etibarlı və sürətli marşruta çevrilib. Prezident İlham Əliyevin vurğuladığı kimi, bu, yalnız iqtisadi məsələ deyil - həm də Türk dünyasının birləşdirici gücünü nümayiş etdirən strateji əməkdaşlıq nümunəsidir.
"Orta Dəhliz" layihəsi ilə yanaşı, Zəngəzur dəhlizinin reallaşması da region üçün yeni tranzit imkanları yaradır. Bu, həm Azərbaycanın, həm də Qazaxıstanın logistik rolunu artırmaqla yanaşı, Türk dövlətlərinin iqtisadi vahidliyini gücləndirəcək.Prezident İlham Əliyevin və Kasım-Jomart Tokayevin qarşılıqlı səyləri nəticəsində bu marşrut Avrasiya ticarət sistemində əsas alternativ xəttə çevrilməkdədir. Artan yük həcmləri və sərmayə axını göstərir ki, Bakı-Astana xətti gələcəyin iqtisadi nəbzini müəyyən edən strateji ox kimi formalaşır.
Bu əməkdaşlıq yalnız iqtisadi mənfəətlə məhdudlaşmır; o, Türk dünyasında qarşılıqlı etimadın, ortaq vizyonun və birgə inkişaf fəlsəfəsinin təzahürüdür. Azərbaycan və Qazaxıstan bu təşəbbüslə Avrasiyanın iqtisadi xəritəsində yeni reallıq yaradır. "Orta Dəhliz" layihəsi təkcə malların deyil, həm də ideyaların, mədəniyyətlərin və inteqrasiya dəyərlərinin ötürülməsi üçün sivilizasiya körpüsü rolunu oynayır. Bu baxımdan, iki ölkənin birgə siyasəti gələcəyin sabit, açıq və inteqrasiya olunmuş Avrasiyasını formalaşdıran strateji modelə çevrilib".