Qarabağda rus icmasının yaradılması təxribatdır
Bakıdakı Rus İcması öz sözünü deməlidir
"Qarabağda rus icmasının yaradılması təxribatdır. Təbii ki, Rusiyanın müxtəlif strukturlarında kök salmış bəzi qüvvələrin hədəflərində o durur ki, Qarabağ münaqişəsi bitməsin, uzun illər davam etsin. Çünki münaqişə bitsə, o zaman sual yaranacaq Qarabağda rus sülhməramlılarına nə ehtiyac var". Bunu "Olaylar"a deyən Sosial Rifah və Tədqiqatlar İctimai Birliyinin sədri Əkrəm Baydəmirlinin sözlərinə görə, Rusiya bölgədə mövcudluğunu saxlamaq üçün daha sivil, Azərbaycanın maraqlarını təmin edəcək üsullar tapmalıdır: " Məkrli siyasətin pespektivi yoxdur. Belə çirkin layihələrə son qoymaq, Qarabağda rus icmasının təhlükəli oyunlarını dayandırmaq üçün Azərbaycan qanunlarının adı çəkilən regionda tətbiqi zəruridir. Artıq ondan sonra bir çox məsələlər tədricən yerini tapacaq. Azərbaycanın çörəyini yeyib, suyunu içən Bakıdakı Rus İcması bu zəruri məqamlarda öz sözünü deməlidir. Ədalətin, haqqın yanında olduğunu ortaya qoymalıdır. Bütün dinlər bir çox mənfilikləri, o cümlədən riyakarlığı qəbul etmir".
