Mövcud şəraitdən yararlanıb Qarabağ məsələsini birdəfəlik bitirmək lazımdır

Uzun illər Ermənistanın təcavüzkar siyasəti, Azərbaycanın torpaq itkiləri haqqında  dünyanın rəsmi stukturları, dövlət nümayəndələri  yetərincə məlumatlı olsalar da,  real vəziyyəti, işğalçının kim olduğunu etiraf edib Ermənistanı təcavüzkar adlandırmırdılar. Çünki  onların maraq dairəsində olub ki, bu münaqişə donmuş vəziyyətdə uzun illər qalsın. Bu baxımdan hazırda istər Qərbi, istərsə də Rusiyanı Qarabağdakı  erməni  silahlı tör-töküntülərinin  zərərsizləşdirilməsi  məsələsi düşündürmür. Amma bu gün bizi həmin ərazilərdən erməni  silahlı tör-töküntülərinin   tamamilə çıxarılması daha çox düşündürür.
Ona görə ki, dünyada  və regionda baş verən hadisələr, sürətlə dəyişən proseslər  onu deməyə əsas verir ki, Qarabağla bağlı hər hansı məsələdə gecikmək olmaz. Mövcud şəraitdən yararlanıb məsələni birdəfəlik bitirmək lazımdır.
Ermənistanın əvəzsiz himayədarı Rusiyanın bu gün üzləşdiyi ağır vəziyyət, Ukrayna ilə müharibədə məğlubiyyət sindromu Şimal qonşumuzun nəfəsini kəsib.

Digər tərəfdən türk dünyasının ağsaqqalı  Türkiyə Prezidenti Rəcəb Tayyib Ərdoğanın sözün yaxşı mənasında Rusiyanı güncə sıxışdırması və özündən asılı vəziyyətə salması Qarabağdakı hərbisizləşdirmə məsələsini tam başa çatdırmağa əlverişli şərait yaradır. Bundan əlavə Azərbaycan Ordusunun  Qarabağda separatçıların toplandığı ərazilərdə  qisas əməliyyatını həyata keçirəndən sonra zavallı baş nazir N. Paşinyanın atdığı addımlar,  Ermənistan- Rusiya münasibətlərinin kəskinləşməsi istiqamətində verdiyi bəyanatlar  antirus əhval-ruhiyyəsini gücləndirib.
  Bizim xeyirimizə olan bu müsbət tendensiyaların, əlverişli məqamların sayını artırmaq olar. Amma bir vacib məqam ondan ibarətdir ki, dünyada  və regionda hadisələr sürətlə dəyişir. Mövcud şəraitdən yararlanıb məkrli qüvvələrin planlarının  gerçəkləşməsinə heç vəchlə imkan vermək olmaz.

Əkrəm Bəydəmirli