Azərbaycan  Cənubi Qafqazın dominant gücü olduğunu regionda marağı olan bütün dövlətlərə qəbul etdirəcək

"Şimalın, Qərbin, Cənubun bütün şəbəkələrinin sabotajlarna, maneçilik cəhdlərinə, cibgir məmurların əməllərinə rəğmən  Azərbaycan  Cənubi Qafqazın dominant, oyun qurucu gücü olduğunu regionda marağı olan bütün dövlətlərə qəbul etdirəcək və ermənilər quzu- quzu gəlib sülh sazişinə imza atacaqlar". "OLAYLAR" xəbər verir ki, bu fikirləri Türk-İslam Araşdırmalar Mərkəzinin sədri Telman Nüsrətoğlu səsləndirib. O bildirib ki, Türkiyə ilə qol- qola ortaq  Türk gücünü də inşa edəcəyik: "Gördüyüm və hazırkı həssas şəraitdə ulu orta  danışmağı, tənqid etməyi, ruh düşkünlüyünə səbəb olacaq şəkildə müzakirə etməyi  uyğun görmədiyim bütün nöqsanlara baxmayaraq  mən buna bütün səmimiyətimlə inanıram. Prezident İlham Əliyevin uzaqgörən siyasət sahibi olmasına, millətimizin fərasətinə, Azərbaycanda gerçək  dövlət ağlını təmsil edən çevrələrin varlığına , Türkiyə ilə  qarşılıqlı istişarə ilə müəyyən edilən  milli təhlükəsizlik və tədricilik metodologiyasıyla böyümə konsepsiyasının mövcudluğuna inamım bu haqdakı əminliyimi artırır".

Telman Nüsrətoğlu onu da qeyd edib ki, ciddi  geosiyasi mübarizələrin mərkəzində yer alan, Rusiya və İran kimi dövlətlərlə qonşu olan,  torpaqları işğal edilmiş, müsəlman Türk kimliyindən dolayı Qərbin ikili standart siyasətiylə üzləşən, üstəlik iki yüz illik müstəmləkə dönəmindən çıxaraq  cəmi  30 ildi müstəqilliyə qədəm qoymuş Azərbaycanın  əldə etdiyi nəticələr kifayət qədər çoxdur: "Bakı- Ceyhan neft kəməri , Bakı- Tiflis- Ərzurum qaz kəməri, Bakı - Tiflis - Qars dəmiryolu,  TANAP, TAP , Türkiyəyə 20 milyara yaxın stratejiq mahiyyətdə yatırımlar, 44 günlük müharibədə böyük  zəfər, Şuşa bəyənnaməsi, Qoşulmama Hərəkatına təkrar sədrlik, Türkmənistan və Özbəkistanla böyük yaxınlaşmada  körpü olmaq,  İpəkyolunun kritik ölkəsi və indi də Avropayla qaz  sazişi.. Biz yüz metrəlik deyil  maraton koşusundayıq.  Ağlı, nəfəsi, zəkası olan qazanacaq".