Özbəkistan portalında Şuşanın işğalının 25 illiyi ilə bağlı məqalə yerləşdirilib

Özbəkistanın tnews.uz portalında Şuşanın işğalının 25 illiyi ilə əlaqədar rus dilində geniş məqalə yerləşdirilib.

Özbəkistanın tnews.uz portalında Şuşanın işğalının 25 illiyi ilə əlaqədar rus dilində geniş məqalə yerləşdirilib.

Məqalədə bildirilir ki, 1992-ci il mayın 8-də qədim tarixi olan Şuşanın işğalı nəticəsində şəhər yerlə yeksan edilib. Vurğulanır ki, şəhər işğal edilənə qədər Şuşada 248 tarixi memarlıq abidəsi, musiqi məktəbləri, muzey, kitabxana və digər sosial-məişət obyektləri olub. Ermənilərin təcavüzü nəticəsində bunların hamısı dağıdılıb.

Azərbaycanın Şuşa səhərinin işğalı nəticəsində 23156 nəfər öz dədə-baba yurdundan qovulub, onlar Azərbaycanın müxtəlif rayonlarına pənah aparıblar. Şəhərin müdafiəsi zamanı 197 nəfər həlak olub, 300-dən artıq insan yaralanıb.

Yazıda deyilir ki, Şuşa şəhəri Azərbaycan musiqisinə və ədəbiyyatına böyük töhfələr verib. Bu qədim şəhərdə zaman-zaman tanınmış musiqiçilər, muğam ustaları, şairlər yaşayıb yaradıblar.

Qeyd olunur ki, işğal nəticəsində ümumən Qarabağda 876 yaşayış məntəqəsi, 7 min sənaye, kənd təsərrüfatı və digər obyektlər, 4366 sosial-mədəni binaları, 616 orta məktəb, 242 məktəbəqədər tərbiyə müəssisəsi, 397 xəstəxana, 4 sanatoriya, 10 məscid dağıdılıb.