KTMT baş katibi: BMT ciddi böhran içindədir- ÖZƏL

Olaylar.az xəbər verir ki, Kollektiv Təhlükəsizlik Müqaviləsi Təşkilatının (KTMT) baş katibi Taalatbek Masadykov bildirib ki, Birləşmiş Millətlər Təşkilatı hazırda ciddi böhran yaşayır. Onun sözlərinə görə, qlobal geosiyasi vəziyyət son dərəcə mürəkkəb və gərgindir, beynəlxalq hüquq isə hər zaman effektiv şəkildə tətbiq olunmur.
Masadykov qeyd edib ki, mövcud beynəlxalq problemlərin həlli yalnız dialoq yolu ilə mümkündür. O, bu baxımdan keçirilən "Yeni Kollektiv Təhlükəsizlik Arxitekturasının Konturları: KTMT İnformasiya və Analitik Tərəfdaşlığının Aktual Məsələləri" adlı beynəlxalq elmi-praktik konfransın əhəmiyyətini vurğulayıb.
Baş katib əlavə edib ki, təşkilat yalnız dialoq platformalarının yaradılması ilə kifayətlənmir, eyni zamanda fəaliyyəti zəifləyən və ya dayanan platformaların yenidən aktivləşdirilməsinə də çalışır.
Masadykovun fikrincə, müxtəlif baxışların ekspertlər, alimlər və siyasətçilər arasında müzakirəsi vacibdir. Bu yanaşma ölkə rəhbərlərinə mürəkkəb beynəlxalq problemlərin həllində kömək edə bilər. O vurğulayıb ki, belə məsələlərin həlli üçün təkcə siyasi iradə kifayət deyil.