Ümummilli lider Heydər Əliyevin anadan olmasının 100 illiyinə həsr olunan “Xalqın hikməti, elin sənəti” adlı sərgi keçirilib - FOTO

İyunun 26-da Milli İncəsənət Muzeyində Ümummilli lider Heydər Əliyevin anadan olmasının 100 illiyinə həsr olunan "Xalqın hikməti, elin sənəti" adlı sərginin açılışı baş tutub. Sərgidə Sərdarlar ailəsinin - Lalə Sərdarlı, Toğrul Sərdarlı, İsgəndər Sərdarlının ərsəyə gətirdiyi bir-birindən maraqlı, incə zövqlə işlənmiş sandıq və sandıqçaları, mücrüləri, eləcə də müxtəlif zərgərlik inciləri tədbir iştirakçılarının marağına səbəb olub. Həmçinin, ekspozisiyada Azərbaycan Milli İncəsənət Muzeyinin kolleksiyasından zəngin ornamentli xovlu və xovsuz xalçalar, nəfis bədii tikmələr də təqdim olunub. Zərgərliklə tətbiqi sənəti sintezləşdirən ailənin əl işləri milli koloriti və orijinallığı ilə göz oxşayır. Çıxışçılar qeyd edib ki, ailə unudulmuş tətbiqi sənət nümunələrinin bugünümüzə yeni məzmun və formatda qayıdışına töhfə verən sənətkarlardır. Azərbaycan Rəssamlar İittifaqının üzvləri olan Sərdarlılar, hazırda Qərbi Azərbaycanın azərbaycanlılara məxsus tarixi ərazilərində formalaşmış mədəni irsinin öyrənilməsi, təbliğ edilməsi yolunda yeni əsərlər yaradırlar. Macarıstan, Şimali Kipr, Kanada muzeylərində, həmçinin müxtəlif ölkələrin tanınmış, nüfuzlu şəxslərinin kolleksiyalarında Sərdarlılar ailəsinin əsərləri saxlanılır. Tədbirdə sənət adamları, ictimaiyyət və media nümayəndələri, millət vəkilləri iştirak ediblər. Ziyarətçilər bir həftə ərzində sərgidə təqdim olunan nəfis sənət nümunələrini izləyə biləcəklər .