İntihar hallarının sayı artıb

Hadi Rəcəbli : “İntihara qalxanların içərisində yetkin, ağıllı adamlar daha çoxdur”

" Televiziyalarda  nümayiş olunan verilişlər, həmçinin, kömpüterdə, internetdə olan məsələlər  insanlar arasında  intiharların  baş verməsinə  gətirib çıxarır". Bu fikirləri mətbuata açıqlamasında Milli Məclisin sosial siyasət komitəsinin sədri Hadi Rəcəbli bildirib. Komitə sədrinin dediyinə görə, burada düşündürücü və narahatedici məqamlardan biri də odur ki,  intihara qalxanların  içərisində yetkin, ağıllı adamlar daha çoxdur: " Bunun da səbəbi yenə  internetin,  kino-filmlərin , həddindən artıq  emosionallığın üzərinə gəlib çıxır. İntiharların başqa səbəbləri də var. Bu, evdə uşaqların sayının az olmasıdır, bu, uşaqların ərköyün böyüməsidir, bu, emosional məqamların güclənməsidir, bu, valideynlərin uşaqlara az vaxt sərf etməsidir". H.Rəcəbli hesab edir ki, uşağının qayğıları ilə yaşayan valideynlər, ancaq uşaqların emosional hisləri ilə yaşamır: " Valideynlər daim onları nəzarətdə saxlamalıdır. Bugünlərdə  qəzetlərin birində oxudum ki, bacısının xəbəri varmış qardaşı bir qız sevir, onların  arasında nəsə münasibətlər var. Valideynlərdən də biri bilməliymiş onu. Oğlan da çox ziyalı, mədəni bir oğlan imiş. Ancaq o, intihara əl atır. Bu, əlbəttə, çox narahatedici bir məsələdir.  Cəmiyyəti düşündürən məsələlərdən biri də elə budur". İntiharların çoxalmasının kökündə sosial problemlərin daha çox dayanması ilə bağlı versiyalara gəlincə, komitə sədri bunu istisna etmədiyini qeyd edib: " Bayaq yuxarıda adını cəkdiyim şəxs də  kasıb adam deyilmiş, imkanlı, işi, hər şeyi olan adam imiş. Deməli, kasıblıq əsas səbəb deyil. Hər dəfə bundan qaçmaq lazımdır. Mən  özüm elə kasıblıqla böyümüşəm ,  necə kasıblıq görmüşəm? Deyirlər, kasıblıq ailə dağıdır. Yalan söhbətdir. Mənə varlı qızı ərə gəlib və mən- kasıb oğlan onunla yaşayıb,  varlı olmuşam. Yəni, dözüm olub. Onun dözümü  hardasa mənə  dəstək olub .  Deməli, pul  əsas şərt deyil".