Uğursuz ailələrin sosial vəziyyəti uşaqlara qarşı zorakılığa səbəb olur

"Azərbaycanda uşaqlara qarşı zorakılıqla mübarizə sahəsində həm dövlət, həm də vətəndaş cəmiyyəti səviyyəsində önəmli işlər görülür. Uşaqlara qarşı zorakılıq son zamanlar yüksək sosial status  əldə edib, yəni, artıq uşaqlara qarşı zorakılıq ayrı-ayrı ailələrin şəxsi məsələsi, bədbəxt hadisə və ya cinayət hadisəsi kimi qəbul edilmir".  Bunu deyən  millət vəkili Sevinc Fətəliyevanın sözlərinə görə, bu, sosial sistemin dövlət tərəfindən ciddi müdaxiləsini tələb edən bir qüsurudur:  "Məsələ ilə bağlı dövlətin bir neçə istiqamətdə fəaliyyəti mövcuddur. İlk növbədə bu, uşaqların həyatını və sağlamlığının  təmin edilməsinə yönəldilmiş ümumi xarakterli proqramlardır. Uşaqlara qarşı zorakılığa səbəb olan faktorlardan biri, uğursuz  ailənin sosial vəziyyətidir. Uğursuz ailələr  bir neçə səbəbdən yaranır. İşsizlik, valideynlərin sağlamlığı , maddi vəziyyət, valideynlər arası münasibətlər. Belə ailələrin aşkar olunması və onlara zamanında lazımı köməkliyin göstərilməsi,  uşaqlara qarşı zorakılıq hallarının aradan qaldırılmasına  şərait yarada bilər.  Bu baxımdan, ailələrlə profilaktiki, maarifləndirici işlərin görülməsi çox önəmlidir".