Xaçmazda baş həkim tərəfindən amansızlıqla döyülən xəstə prezidentə müraciət etdi

Xaçmaz  rayon sakini, epileptik nevroz xəstəliyindən əziyyət çəkən 2-ci qrup əlil  Niyaz Mehrəliyev Xaçmaz rayon Mərkəzi Xəstəxanasının baş həkimi tərəfindən xüsusi amansızlıqla döyülüb. Bu barədə "OLAYLAR"a zərərçəkmişin özü müraciət edib. Niyaz Mehrəliyev deyib ki, o dövlət tərəfindən pulsuz verilməli olan dərmanları tələb etdiyi üçün döyülüb: "Mən  2-ci qrup  əliləm. Uzun illərdir ki, epileptik, nevroz xəstəliyindən əziyyət  cəkirəm və dispanserdə  qeydiyyatdayam. 47 yaşım var, 3 övlad  atasıyam. 44 manat təqaüd alıram.  Xaçmaz rayon  xəstəxanası isə  mənə iynə-dərman verməkdən imtina edir. İki il öncə  xəstəxanadan dərman tələb etsəm də, Xaçmaz rayon xəstəxanasının baş həkimi  Bəhram Şahverdiyev  və onun tapşırığı ilə bir neçə həkim  məni  tibb müəssəsinin dəhlizində vəhşicəsinə döydülər. Bundan sonra məndə  daha ciddi fəsadlar baş qaldırdı. 2 ildir müraciət  etmədiyim orqan qalmayıb. Heç kim məni eşitmək belə istəmir". 

Baş həkim və onun tabeçiliyində olan həkimlər tərəfindən döyülən Niyaz Mehrəliyev çarəsiz qalıb prezident İlham Əliyevə müraciət edib. 2-ci qrup əlil prezidentdən kömək istəyir və həkimlərin ona qarşı törətdikləri özbaşınalıqların qarşısının alınmasını, onların cəzalandırılmasını  xahiş edir.