Rostislav İşenko: “Azərbaycanda vəziyyət sakit və sabitdir”

"Россия сегодня" Beynəlxalq İnformasiya Agentliyinin icmalçısı Rostislav İşenkonun Seçki-2015.az saytına müsahibəsi

- Noyabrın 1-də keçirilən parlament seçkilərinin Azərbaycan üçün əhəmiyyəti nədən ibarətdir?

- Hesab edirəm ki, istənilən seçki vacibdir. İlk növbədə ona görə ki, hakimiyyətin legitimliyi - xalq mandatı təsdiqlənir. Əgər ölkədə vəziyyət kifayət qədər sakit və sabitdirsə, düşünmürəm ki, o zaman hazırki seçkilər haqqında qeyri-adi nəsə demək olar.

- Rusiyanın Azərbaycandakı parlament seçkilərinə artan marağını necə izah etmək olar?

-Aydın görünür ki, Rusiya KİV-ləri Azərbaycandakı seçkilərə daha böyük diqqət yetirir, nəinki İsveçdə keçirilən seçkilərə. Digər tərəfdən, Azərbaycan MDB-nin üzvüdür və postsovet məkanında  inteqrasiya layihələrinin potensial iştirakçısıdır. Həmçinin nəzərə almaq lazımdır ki, 24 il əvvəl biz eyni ölkələrdə yaşamışıq.

- İkitərəfli münasibətlər kontekstində Moskvanın seçki sonrası prosesindən gözləntiləri nədir?

- Gözləntilər çox aydın və şəffafdır. Bu gözləntilər seçkilərlə yanaşı, ikitərəfli münasibətlər strategiyasının inkişafına da aiddir.  Moskvada hesab edirlər ki, Azərbaycanla dost, qarşılıqlı maraq doğuran dinamik inkişaf davam edəcək.

- Xəzər regionunun siyasi mühitində hansısa dəyişikliklər gözləmək olarmı?

- Xəzər regionunda siyasi mühit kifayət qədər qəlizdir. "Xəzər beşliyi" çərçivəsində müşayiət olunan siyasi və iqtisadi əlaqələr uzunmüddətli danışıqların  və kompromislərin nəticəsidir.  Hazırki vəziyyətin və ya formatın dəyişəcəyi gözlənilmir.