Tolik: "Natavanın anasına bu iki il ərzində əsəb yaşatdım"

Prodüser Tarix Əliyev (Tolik) müğənni Natavan Həbibi ilə barışıb. Lent.az-ın məlumatına görə, prodüser barışıq barəsində sosial şəbəkədə status yazıb: "Bildiyiniz kimi bir neçə gündür, mən Azərbaycanda deyiləm. Qərib ölkədə aylardır, münasibətimiz anlaşılmaz olan Natavan Həbibi ilə görüşdük, danışdıq və bu söz-söhbətə son qoymaq qərarını verdik. Bir etiraf etmək istəyirəm ki, mən onun ailəsində aylardır, narahatlıq yaratmışam. Bizim barışığımızı kimlərsə nəyəsə yozmasın. Deyim ki, məhkəmənin çıxardığı hökmə görə biz Natavanla barışmayacaqdıq. Ortada üzr istəmək məsələsi var idi. Barışığımız isə səmimi oldu. Bu açıqlama ilə nəyisə sübut etmirəm. Mənim əsəbdən ürəyim ağrımağa başlayıb. Mən həm özümə, həm də Natavanın anasına bu iki il ərzində əsəb, stress yaşatdığım üçün məsələnin həlli yolunu sülhdə tapdıq. Xüsusi olaraq vurğulamaq istəyirəm ki, bu barışıq nə Aygün xanıma görədir, nə də başqa bir adama görə... Bundan sonra kimlərinsə davasında adımın hallandırılmasına şərait yaratmayacağam. Sadəcə söz söhbət, dava-dalaş nəyə lazımdır? İnanıram k, həm Natavan Həbibini, həm də məni çox istəyənlər bu barışığı normal qəbul edəcəklər. Biz süni barışmadıq. Bunu təkar yazıram ki, əlavə suallar olmasın".

Qeyd edək ki, müğənni N.Həbibi prodüser Toliki şərəf ləyaqətinin təhqir olunması, işgüzar nüfuza xələl gətirməsi iddiası ilə məhkəməyə vermişdi. Məhkəmənin qərarına əsasən, Aygün Kazımova, Tolik və Zöhrab Ağayev Natavan Həbibinin erməni milliyyətinə mənsubluğu barədə yaydığı yalan məlumatı və işlətdiyi təhqiramiz ifadələri təkzib etməli, ondan üzr istəməli idi. Onu da əlavə edək ki, yeni barışan iki tanınmış birgə foto da çəkdiriblər. Həmin fotonu təqdim edirik.