Bakıda oğru dəstəsi saxlanıldı

Dəstə üzvləri bir sıra oğurluqlarda günahlandırılırlar

Bakıda oğurluqla məşğul olan dəstə üzvləri saxlanılıb. Bakı Şəhər Baş Polis İdarəsindən ANS PRESS-ə verilən məlumata görə, dəstə üzvləri Xətai RPİ 36-cı PB əməkdaşlarının keçirdikləri əməliyyat nəticəsində ifşa olunublar. Belə ki, Bakı şəhər sakini Orxan Əsədov mayın 21-də, Balakən rayon sakini Elsevər Mirəliyev və Bakı şəhər sakini, əvvəllər məhkum olunmuş Tural Qasımov isə iyunun 5-də yaxalanıblar. Məlum olub ki, onlar mayın 20-nə keçən gecə Bakı şəhər sakini Ehtiram Qurbanova məxsus "VAZ-2105" markalı avtomobili X.Məmmədov küçəsindən qaçırıblar.
Bundan başqa, mayın 21-də X.Məmmədov küçəsində Kamran Həsənəliyevin mobil telefonunu əlindən alaraq qaçmış, iyunun 4-nə keçən gecə isə eyni küçədə yerləşən, Ruflan Xəlilova məxsus dönərxanadan qapının qıfılını sındırma yolu ilə kassa aparıtı və elektrik qızdırıcısı oğurlayıblar.