Bakıda çağırışa tələsən təcili yardım maşını aşdı

Həkim xəsarət alıb. Bakının Sabunçu rayonu ərazisində xəstə üstünə tələsən təcili yardım maşını qəzaya uğrayıb. Hadisə şahidlərinin Milli.Az-a verdiyi məlumata görə, bu gün saat 16:30 radələrində Kürdəxanı qəsəbəsində təcili yardım maşını yoldan çıxaraq aşıb. Yolun kənarında olan dəmir boru maşının dərəyə yuvarlanmasının qarşısını alıb.
Sabunçu Rayon Polis İdarəsindən Milli.Az-a bildirildi ki, təcili yardım maşını sərnişin avtobusu ilə toqquşub. Sonra idarəetmədən çıxaraq aşıb.
Qəza zamanı təcili yardım maşınında olan həkim xəsarət alıb. Məlumata görə, təcili yardım xəstə çağırışına gedirmiş.