Balakənin yol polis rəisi güllələndi

Asif Qasımovun intihar etdiyi bildirilir

Balakən Rayon  Polis  Şöbəsinin  Dövlət Yol Polisi bölməsinin rəisi özünü güllələyib öldürüb. Bu barədə "OLAYLAR"a rayon sakinləri məlumat verib. Məlumata görə, bölmə rəisi, polis mayoru Asif Qasımov tabel silahı ilə başından atəş açaraq özünü öldürüb. Hadisə Balakən rayonu ərazisində baş verib. Sakinlərin dediyinə görə, polis mayoru  xidməti otağından tabel silahını götürüb çıxıb  və bir saatdan sonra onun özünü öldürməsi barədə məlumat yayılıb.  Mənbənin məlumatına görə, polis mayorunun meyidi rayon ərazisində güllələnmiş vəziyyətdə tapılıb və polis şöbəsinə məlumat verilib.  Mayorun özünə qəsd etməsinin səbəbləri barədə dəqiq məlumat yoxdur.  Məlumata görə, onun  xəstəlikdən əziyyət çəkməsi barədə məlumat ölümündən sonra yayılıb. Amma, sakinlər və rayon polis əməkdaşlarında bu vaxta qədər belə məlumat olmayıb.
Faktla bağlı Balakən Rayon Prokurorluğu tərəfindən cinayət işi başlanıb, araşdırma aparılır.