Bakı-Tokio xəttində strateji yaxınlaşma: Yeni əməkdaşlıq imkanları açılır- ÖZƏL

"Azərbaycan Respublikasının xarici işlər naziri Ceyhun Bayramovun Yaponiyaya rəsmi səfəri Bakı ilə Tokio arasındakı ənənəvi dostluq münasibətlərini keyfiyyətcə yeni və daha strateji müstəviyə qaldırmaq potensialına malik mühüm diplomatik hadisədir. İqtisadiyyatın rəqəmsallaşması, "yaşıl enerji"yə keçid və qlobal logistika zəncirinin yenidən qurulduğu bir dövrdə bu rəsmi təmaslar, xüsusilə işğaldan azad edilmiş ərazilərin "ağıllı şəhər" və "ağıllı kənd" konsepsiyaları əsasında bərpasında Yaponiya texnologiyalarının tətbiqi, bərpa olunan enerji mənbələrinin inkişafı və qeyri-neft sektoruna yüksək texnoloji investisiyaların cəlb edilməsi kimi yeni əməkdaşlıq istiqamətlərini ciddi şəkildə gücləndirə bilər".
Bu fikirləri politoloq Tural İsmayılov Olaylar.az-a açıqlamasında söyləyib:
"Digər tərəfdən, bu səfər çərçivəsində keçirilən yüksək səviyyəli görüşlər Cənubi Qafqaz və Şərqi Asiya regionları arasında fərqli bir geosiyasi və diplomatik balansın formalaşmasına zəmin yaradır. Azərbaycanın mühüm qovşağı olduğu Orta Dəhliz layihəsinin beynəlxalq logistikada rolu artdıqca, Yaponiyanın bu marşruta və regionun sabitliyinə marağı daha da dərinləşir; bu isə iki bölgə arasında təkcə iqtisadi deyil, həm də regional təhlükəsizlik və beynəlxalq hüququn aliliyi prinsipləri çərçivəsində qarşılıqlı siyasi dəstək mexanizmlərini möhkəmləndirir. Ceyhun Bayramovun Tokio danışıqları iki ölkə arasında uzunmüddətli iqtisadi tərəfdaşlığı şaxələndirməklə yanaşı, Azərbaycanın Asiya-Sakit okean regionundakı diplomatik mövqelərini möhkəmləndirən və tərəflərin qlobal çağırışlara qarşı strateji həmrəyliyini nümayiş etdirən sanballı bir addım kimi qiymətləndirilməlidir".

Zeynəb Mustafazadə