Enerji siyasəti ölkənin ümumi iqtisadi modelinin ayrılmaz hissəsinə çevrilib- ÖZƏL

"Enerji sektorunda uzunmüddətli uğurun əsas şərtlərindən biri makroiqtisadi sabitlikdir. Azərbaycanın aşağı xarici borc səviyyəsi, yüksək valyuta ehtiyatları və müsbət kredit reytinqləri enerji layihələrinin maliyyə risklərini minimuma endirir. Bu amillər xarici investorlar üçün etibarlı və proqnozlaşdırıla bilən mühit yaradır". "Olaylar" xəbər verir ki, bunu YAP Şuşa rayon təşkilatının 25 saylı ərazi partiya təşkilatının sədri Aynurə Məlikova deyib: ""Xızı-Abşeron" Külək Elektrik Stansiyasının beynəlxalq investor tərəfindən icra olunması bu etimadın praktik təzahürüdür. Uzunmüddətli enerji müqavilələrinin dəyişməzliyi və hüquqi öhdəliklərin qorunması prinsipi Azərbaycanın investisiya siyasətinin əsas sütunlarından biridir. Bu yanaşma enerji sektorunda kapital axınının davamlılığını təmin edir.
Eyni zamanda, enerji siyasətinin sənaye və rəqəmsal transformasiya ilə uzlaşdırılması xüsusi diqqət çəkir. Süni intellekt, data mərkəzləri və yüksək enerji tutumlu sahələr üçün etibarlı enerji təminatı gələcək iqtisadi inkişafın əsas şərtlərindən biridir. Azərbaycan bu çağırışları qabaqlayan strategiya formalaşdırıb.
Nəticə etibarilə, enerji siyasəti ölkənin ümumi iqtisadi modelinin ayrılmaz hissəsinə çevrilib. "Xızı-Abşeron" KES bu modelin real nəticələrini nümayiş etdirən əsas layihələrdən biridir".