Antiinhisar və İstehlak Bazarına Nəzarət Dövlət Agentliyi ilə Gürcüstanın Rəqabət və İstehlakçıların Hüquqlarının Müdafiəsi Agentliyi arasında Qarşılıqlı Fəaliyyət Planı imzalanıb
Qarşılıqlı Fəaliyyət Planı tərəflər arasında rəqabət siyasəti və istehlakçı hüquqlarının müdafiəsi sahəsində əməkdaşlığın gücləndirilməsi, təcrübə mübadiləsinin genişləndirilməsi və qarşılıqlı fəaliyyətin daha da inkişaf etdirilməsi məsələlərini ehtiva edir.
Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyinin Aparat rəhbəri Tural İsmayılovun rəhbərlik etdiyi nümayəndə heyəti Gürcüstana işgüzar səfər edib. Səfər çərçivəsində nümayəndə heyəti Tbilisi şəhərində keçirilən "Rəqabət və istehlakçıların müdafiəsi" mövzusunda IV Beynəlxalq Konfransda iştirak edib.
Üç gün müddətində davam edən konfrans çərçivəsində davamlı iqtisadi inkişafın təmin edilməsində rəqabət siyasətinin rolu, rəqabət mühitinin tənzimlənməsində qlobal yanaşmalar, eləcə də istehlakçı hüquqlarının müdafiəsi ilə bağlı mövcud trendlər və çağırışlara dair təqdimatlar edilib, panel müzakirələri təşkil olunub.
Agentliyin Hüquq şöbəsinin əməkdaşı Şəhla Eyvazzadə "Tənzimlənən sektorlarda rəqabət siyasəti: çağırışlar və imkanlar" adlı panel müzakirəsində çıxış edərək tənzimlənən bazarlarda rəqabət mühitinin formalaşdırılması, istehlakçıların hüquqlarının qorunması və bu istiqamətdə tətbiq olunan hüquqi və institusional mexanizmlər barədə məlumat verib.
Panel müzakirələrində həmçinin istehlakçı hüquqlarının müdafiəsində beynəlxalq təşkilatların rolu, bu sahədə tənzimləyici qurumların, eləcə də qeyri-hökumət təşkilatları və vətəndaş cəmiyyəti institutlarının fəaliyyəti, istehlakçıların hüquqlarının müdafiəsi ilə bağlı maarifləndirmə və davamlı inkişafa nail olmaq üçün tətbiq edilən qlobal mexanizmlərə dair fikir mübadiləsi aparılıb, təqdimatlar nümayiş etdirilib.
Tədbir çərçivəsində Azərbaycan Respublikasının Prezidenti yanında Antiinhisar və İstehlak Bazarına Nəzarət Dövlət Agentliyi ilə Gürcüstanın Rəqabət və İstehlakçıların Hüquqlarının Müdafiəsi Agentliyi arasında Qarşılıqlı Fəaliyyət Planı imzalanıb. Sözügedən sənəd iki qurum arasında rəqabət siyasəti və istehlakçı hüquqlarının müdafiəsi sahəsində əməkdaşlığın gücləndirilməsi, təcrübə mübadiləsinin genişləndirilməsi və qarşılıqlı fəaliyyətin daha da inkişaf etdirilməsini nəzərdə tutur.