Rusiya və Qazaxıstandan Azərbaycana 4-5-ci sinif buğda idxal olunur - AÇIQLAMA

Vahid Məhərrəmov: “Qazaxıstandan Azərbaycana gətirilən edilən buğdanın yapışqanlığı 22 faizə bərabərdir”

"Azərbaycanda istehsal olunan buğda standartlara cavab vermədiyinə görə son 5-6 illərdə ölkənin ərzaq buğdasına olan tələbat Rusiya və Qazaxıstandan idxal olunan buğdanın hesabına ödənilir". Bunu "OLAYLAR"a açıqlamasında kənd təsərrüfatı üzrə ekspert Vahid Məhərrəmov deyib. Onun sözlərinə görə, Azərbaycanın ərzaq buğdasına olan təlabatı heç də  hökumət  vurğuladığı kimi 1 milyon 400 min deyil: "Ölkənin ərzaq buğdasına olan tələbat  1100- 1150 min tondur. Nəzərə alsaq ki hər il ölkəyə 1100- 1400 min ton buğda və bundan əlavə  100 min tondan artıq buğda unu idxal olunur  tam məsuliyyətlə demək olar ki,  çörək məhsullarına olan tələbatımızı artıqlaması ilə idxalın hesabına ödəyirik.  İdxal olunan taxılın bir hissəsi pivə bişirmədə, spirtli içki istehsalında  və digər sahələrdə istifadə olunur". Ekspert deyir ki, Qazaxıstandan  Azərbaycana 700-800 min ton  buğda ixrac edən şirkətin verdiyi məlumata görə,  onların ixrac etdikləri məhsulun yəni yumşaq buğdanın yapışqanlığı  22 faizə bərabərdir: "Bu isə ən yaxşı halda həmin buğdanın 4 sinif yumşaq buğda olduğundan xəbər verir.  Son zamanlar  Qazaxıstan  buğdasının keyfiyyətinin düşməsi dövlət rəhbərlərini də ciddi narahat edir. Belə ki, hələ 2010 -cu ilin mart ayında Qazaxıstan prezidenti  N. Nazarbayev istehsal olunan buğdanın keyfiyyəti ilə bağlı Nazirlər Kabinetinin iclasını keçirmiş və həmin yığıncaqda  məhsulun keyfiyyətinin ciddi aşağı düşdüyü vurğulayıb". V.Məhərrəmov onu da qeyd edib ki, ümumiyyətlə Azərbaycanda əvvəllər olduğu kimi buğda və un idxalı ilı məşğul olan sahibkarlar çalışır ki, daha ucuz məhsul alıb daha çox qazanc əldə etsin. Elə bu səbəbdən də  idxal olunan yumşaq buğdanın keyfiyyəti 4-5 sinif  standartına cavab verir.  Bu standarta cavab verən yumşaq  buğdadanın əksər sivil ölkələrdə çörəkbişirmədə istifadəsinə  qadağa qoyulub.  Əksər ölkələrdə 4-5 -ci sinif buğdadan  əsasən mal-qara yemi kimi istifadə olunur.