Azərbaycan Dövlət Neft Şirkəti 2025-ci ilədək Xəzərdəki yeni neft-qaz yataqlarında hasilata başlayacaq

Azərbaycan Dövlət Neft Şirkəti (ARDNŞ) 2025-ci ilədək Xəzərin milli sektorunda yerləşən yeni yataqlarda neft-qaz hasilatına başlamaq fikrindədir. "APA-Economics"in məlumatına görə, bunu Bakıda keçirilən beynəlxalq neft-qaz konfransındakı çıxışı zamanı ARDNŞ-in iqtisadi məsələlər üzrə vitse-prezidenti Süleyman Qasımov bildirib.
Onun sözlərinə görə, kompleks tədbirlər planına əsasən, "Ümid", "Qarabağ", "Əşrəfi" yataqlarının, "Babək", "Abşeron", "Naxçıvan", "Şəfəq-Asiman", "D-30" perspektiv strukturların və "Azəri-Çıraq-Günəşli" yataqlarının sərbəst qaz obyektlərinin tədricən abadlaşdırılması və istismara daxil edilməsi nəzərdə tutulur. Qeyd olunan yataqlardan "Ümid", "D-30", "Qarabağ", "Babək", "Əşrəfi"nin ARDNŞ tərəfindən, digər yataqların isə xarici tərəfdaşlarla birgə işlənməsi nəzərdə tutulub. S.Qasımov bildirib ki, hasilata 2019-cu ildə başlanması nəzərdə tutulan "Babək" perspektiv strukturunun qaz ehtiyatı 400 mlrd. kubmetr, kondensat ehtiyatı isə 80 mln. ton, hasilata 2021-ci ildə başlanması nəzərdə tutulan "Qarabağ" yatağının qaz ehtiyatı 20 mlrd. kubmetr, neft və kondensat ehtiyatı 20 mln. ton, hasilata 2023-cü ildə başlanması nəzərdə tutulan "Əşrəfi" yatağının qaz ehtiyatı isə 13 mlrd. kubmetr, neft və kondensat ehtiyatı isə 17 mln. ton həcmində qiymətləndirilir.