Azərbaycan ÜTT-də Ermənistanla əməkdaşlıq etməyəcək

Azərbaycan Ümumdünya Ticarət Təşkilatına (ÜTT) daxil olacağı halda Ermənistanla əməkdaşlıq etməyəcək. "OLAYLAR"ın məlumatına görə, bunu jurnalistlərə açıqlamasında Azərbaycanın xarici işlər nazirinin müavini Mahmud Məmmədquliyev bildirib. Onun sözlərinə görə, Azərbaycan ÜTT-yə qəbul olunandan sonra Ermənistanla əməkdaşlığa məcbur edilə bilməz: "ÜTT-nin Nizamnaməsində belə bir maddə var ki, siyasi təhlükəsizlik məsələləri nəzərə alınaraq bu və ya digər ölkə bir-biri ilə əməkdaşlıq etmir.  Ermənistan ÜTT-yə daxil olarkən erməni tərəfi məktub göndərərək bildirib ki, o, Azərbaycanın bu təşkilata daxil olmasına mane olmayacaq. ÜTT-yə üzv olan ölkə kimi Ermənistan Azərbaycanın quruma qəbulu üzrə işçi qrupun iclaslarında iştirak edir, amma heç bir sual və təklif göndərmir. Çünki cavab almayacağını bilir".