Fransa istehsalı olan “Kurzat” saxta çıxdı
Materiallar Baş Prokurorluğuna göndərilib
Ölkədə pestisdlərin, bioloji preparatların və aqrokimyəvi maddələrin keyfiyyətinə nəzarəti gücləndirmək məqsədilə Kənd Təsərrüfatı Nazirliyi yanında Dövlət Fitosanitar Nəzarəti Xidməti tərəfindən aparılan araşdırmalar zamanı Bərdə şəhəri, H. Əliyev prospektində yerləşən və Cəlilabad şəhəri, Cavadxan küçəsində yerləşən bitki mühafizəsi üçün pestisidlərin satış mağazalarında Fransa istehsalı olan "Kurzat" adı altında preparatların satıldığı aşkar edilib. Nazirlikdən "Olaylar"a verilən məlumata görə, hər iki mağazada "Kurzat" preparatı adı ilə satılan mallardan nümunə götürülərək Kənd Təsərrüfatı Nazirliyi yanında Dövlət Fitosanitar Nəzarəti Xidmətinin Respublika Toksikologiya və Keyfiyyətə Nəzarət Mərkəzinin Pestisdlərin, bioloji preparatların və aqrokimyəvi maddələrin keyfiyyət göstəricilərinin təyini laboratoriyasında yoxlanılıb. Laboratoriya analizinin nəticələrinə əsasən mağazadan götürülən "Kurzat" preparatında təsiredici maddənin (misxloroksid) miqdarı normadan aşağı olduğu, yəni saxtalaşdırıldığı müəyyən edilib. Qeyd olunan hallar üzrə fitosanitar qanunvericiliyin tələblərinin pozulması ilə bağlı toplanmış ilkin materiallar hüquqi qiymət verilməsi üçün Azərbaycan Respublikası Baş Prokurorluğuna göndərilib.