Pelenin forması rekord qiymətə SATIŞA ÇIXARILDI

Dünya futbolunun əfsanəsi Pelenin 1958-ci il dünya çempionatının finalında geyindiyi forma hərraca çıxarılacaq.

Milli.Az xarici mətbuata istinadən xəbər verir ki, tarixi idman geyimi 6 milyon dollardan artıq məbləğdə qiymətləndirilir. Forma iyulun əvvəlindən etibarən nümayiş etdiriləcək, hərracın isə iyulun 16-da keçirilməsi planlaşdırılır.

Qeyd edək ki, Pele həmin vaxt cəmi 17 yaşında idi. O, İsveç millisinə qarşı keçirilən final qarşılaşmasında iki qol vuraraq Braziliyanın 5:2 hesablı qələbəsində mühüm rol oynamışdı. Bu zəfər Braziliya futbol tarixinin ən yaddaqalan uğurlarından biri hesab olunur.

Mütəxəssislər hesab edirlər ki, əfsanəvi "10 nömrə"nin forması idman tarixində ən bahalı satışlardan birinə çevrilə bilər. Hazırda bu sahədə rekord Diyeqo Maradonaya məxsusdur. Onun 1986-cı il dünya çempionatında İngiltərəyə qarşı matçda geyindiyi məşhur forması milyonlarla dollara satılmışdı.

Məlumata əsasən, Pele final oyunundan sonra formanı komanda yoldaşı və yaxın dostu Didaya hədiyyə edib. Uzun illər ailə tərəfindən qorunan bu nadir idman əşyası sonradan kolleksiya bazarına çıxarılıb.

Hərrac iyunun 29-dan iyulun 16-na qədər davam edəcək. Lotun ilkin qiymətləndirilməsi təxminən 6 milyon dollar təşkil edir.

Tarixi formanın hərraca çıxarılması futbol azarkeşləri və kolleksiyaçılar arasında böyük maraq doğurub.