Neymar-a 846 milyon funtluq miras qaldığı iddia olunur – ÖZƏL

Olaylar.az xəbər verir ki, Braziliyadan sensasion xəbər yayılıb - 33 yaşlı futbolçu Neymarın naməlum milyarderdən 846 milyon funt sterlinq dəyərində sərvətin yeganə varisi olduğu bildirilir.

Braziliya mediasının məlumatına görə, vəsiyyət Porto-Aleqredəki ofisdə tərtib olunub və 12 iyunda iki şahidin iştirakı ilə təsdiqlənib. Hazırda miras məsələsinə braziliyalı məhkəmələr baxır.

Yerli mətbuat yazır ki, milyarder heç bir övladı və ailəsi olmadığı üçün sərvətini Neymar-a buraxmağa qərar verib. Onun futbolçu ilə şəxsi səviyyədə özünü eyniləşdirdiyi, xüsusilə Neymarın atası ilə münasibətlərinə heyran qaldığı bildirilir. Milyarder bu yaxınlığı öz mərhum atasını xatırlatdığı üçün yüksək qiymətləndirib.

Neymarın karyerasına dönüş

Yanvarda Neymar doğma klubu "Santos"a qayıdıb. Səudiyyə Ərəbistanının "Əl-Hilal" komandasında uğursuz mövsümdən sonra, 2024-25-ci ilin ikinci yarısında Braziliya klubunun heyətində 14 oyunda 3 qol vurub. Futbolçu 2009-2013-cü illərdə "Santos" üçün 225 oyunda 136 qol ilə yadda qalıb.

İyun ayında Neymar klubla müqaviləsini uzadıb. Bu qərar onun 2026-cı il dünya çempionatında Braziliya yığmasında iştirakına yol aça bilər. "Santos mənim komandam deyil, evim, köklərim və həyatımın bir parçasıdır. Burada özümü xoşbəxt hiss edirəm", - deyə Neymar klub saytına açıqlama verib.

Xatırladaq ki, Neymar 2023-cü ilin oktyabrından bəri diz bağının zədəsinə görə yığmada çıxış etmir. Buna baxmayaraq, 79 qolla Braziliya millisinin ən məhsuldar oyunçusu olaraq qalır.