Boksçumuz Avropa birinciliyində 1/4 finala vəsiqə qazanıb

Xorvatiyanın Poreç şəhərində gənc boksçular arasında Avropa birinciliyi davam edir.

Olaylar.az xəbər verir ki, yarışın beşinci günündə Azərbaycan millisinin daha bir idmançısı ilk görüşünü qələbə ilə başa vurub.

Zidan Hümbətov Cemi Kollinsdən (İrlandiya) güclü olub. 51 kq çəkidə mübarizə aparan yığma üzvü ilk 2 raundda qələbə qazanıb. Üçüncü raundda isə hakim rəqibini diskvalifikasiya edib və Hümbətov 1/4 finala yüksəlib.

Zidan növbəti qarşılaşmasını aprelin 11-də Safari Mohammad Rizaya (İngiltərə) qarşı keçirəcək.

Abbasqulu Şadlinski (67 kq) isə 1/8 finalda Arturs Vayslaya (Latviya) uduzub.

Qeyd edək ki, Avropa birinciliyinə aprelin 14-də yekun vurulacaq.