Daha bir idmançımızda dopinq tapıldı

Beynəlxalq Ağır Atletika Federasiyası London Yay Olimpiya Oyunlarında götürülən dopinq testinin təkrar yoxlanılması zamanı müsbət nəticə verən 11 idmançının adını açıqlayıb.

Beynəlxalq Ağır Atletika Federasiyası London Yay Olimpiya Oyunlarında götürülən dopinq testinin təkrar yoxlanılması zamanı müsbət nəticə verən 11 idmançının adını açıqlayıb.

Apasport.az xəbər verir ki, siyahıda Azərbaycan millisinin ağırlıqqaldıranı İntiqam Zairov da var.

Belə ki, London-2012-də idmançımızdan götürülən analiz təkrar yoxlamada müsbət nəticə verib. Onun orqanizmində deqidroxlorometiltestosteron aşkarlanıb.  4 il öncəki Olimpiadada 94 kq çəki dərəcəsində 6-cı olan Zairovun 8 illik diskvalifikasiyası da var.
 
Ümumilikdə siyahıda 4 rusiyalı varsa, Azərbaycan, Gürcüstan, Ermənistan, Türkiyə, Moldova, Belarus və Qazaxıstanın bir atleti yer alıb.
 
Qeyd edək ki, Zaurova qədər yığmamızın digər üzvü Sərdar Həsənov Pekin-2008, Boyanka Kostova da London-2012-də istifadəsi qadağan olunan preparatlardan istifadədə günahlandırılıb. Kostova və Həsənovdan fərqli, ABŞ-ın Hyuston şəhərində təşkil olunan dünya çempionatında dopinq testdən keçə bilməyən Elxan Əliquluzadə, Silviya Angelova, Firudin Quliyev, Valentin Xristov və İntiqam Zairov 8 il müddətinə diskvalifikasiya olunub. Onların cəzaları 2023-cü ilin dekabrında yekunlaşacaq. Dadaş Dadaşbəyli isə 4 illik cəzaya məruz qalıb. Onun cəza müddəti 2019-cu ilin dekabrınadək nəzərdə tutulub. Həmçinin Xristovun həmin çempionatda qazandığı bürünc medalı əlindən alınıb və yığmamız Rioya qazandığı 4 lisenziyadan məhrum edilib.