Millimiz Avropa birinciliyinin bürünc medalçısıdır
Azərbaycanın gənclərdən ibarət stolüstü tennis üzrə yığma komandası Xorvatiyada keçirilən 46 ölkənin iştirak etdiyi Avropa birinciliyində üçüncü yeri tutub.
Azərbaycanın gənclərdən ibarət stolüstü tennis üzrə yığma komandası Xorvatiyada keçirilən 46 ölkənin iştirak etdiyi Avropa birinciliyində üçüncü yeri tutub. Yarımfinalda Rusiya millisinə məğlub olan tennisçilərimiz bürünc medala sahib olublar. "OLAYLAR"-ın GİN-ə istinadən verdiyi xəbərə görə, yeniyetmə qızlarımız Çex Respublikasının yığma komandasına və Fransa millisinə qalib gələrək 9-cu yeri qazanıblar. Xorvatiya və Fransa millilərini məğlub edən gənc qızlarımız isə 5-ci yeri tutublar. Qeyd edək ki, Azərbaycanın stolüstü tennis tarixində ilk dəfə olaraq bu cür yüksək nəticələr əldə olunub. Gənclər arasında Avropa birinciliyi iyulun 17-dək davam edəcək. Qarşıda yeniyetmə və gəncləri şəxsi, qoşa və qarışıq qoşa dərəcələrdə medallar uğrunda mübarizə gözləyir.