"Ronaldu nə edəcəyini yaxşı bilir"

"Polşa yığması Xorvatiyaya bənzəyir. Müdafiədən hücuma sürətlə çıxırlar".

Apasport.az xəbər verir ki, bu sözləri Portuqaliya yığmasının baş məşqçisi Fernandu Santuş deyib.

Pireney təmsilçisi AÇ-2016-nın 1/4 final mərhələsi çərçivəsində bu gün Polşa millisi ilə üz-üzə gələcək.    
Matçdan öncə UEFA-nın rəsmi saytına danışan Santuş rəqib barədə müsbət fikirlər səsləndirib:

"Polşa yığmasında məşqçi işi açıq-aşkar görünür. Onlarda da matçın taleyini təkbaşına həll edə biləcək futbolçular var. Rəqibin standart vəziyyətdə necə oynadıqlarını təhlil etmişik. Top bizdə olanda Polşa yığmasının boşluqlarından istifadə etməyə çalışacağıq. Ümumiyyətlə, bu komanda mənim üçün tanış rəqibdir. Yaxşı xatırlayıram, Yunanıstan yığmasının baş məşqçisi olanda AÇ-2012-nin açılış matçında məhz Polşa ilə qarşılaşmışdıq. Həmin heyətdən Blaşikovski və Levandovski kimi futbolçular indi də millidədirlər. Təbii ki, həmin vaxtla müqayisədə polyaklar çox "artırıblar". Ancaq budəfəki matçı 4 il öncəki ilə müqayisə etmək doğru olmaz. Yarımfinala çıxmaq şanslarımız bərabərdi".
 
Santuş söhbət əsnasında Portuqaliya yığmasının kapitanı Kriştianu Ronaldu haqda da fikirlərini bölüşüb: "Hamı Kriştianu Ronaldu haqda danışır, bu da başadüşüləndir. O, möhtəşəm futbolçudur. Yalnız böyük futbolçuları tez-tez müzakirə edirlər - Ronaldu, Levandovski və Noyer kimi. Bunlar Kriştianunun diqqətini yayındıra bilməz. Çünki o, nə edəcəyini yaxşı bilir".