"Qəbələ" Avropa Liqasının pley-off mərhələsinə yüksəldi

Səfərdə 1:1 hesablı heç-heçəyə nail olan "Qəbələ" 1:0 hesablı qələbə qazanaraq tarixində ilk dəfə avrokubokda pley-offa yüksəldi

Avropa Liqasında III təsnifat mərhələsinin cavab oyunları keçirilib. Apasport.az saytının məlumatına görə, Azərbaycan çempionatının bürünc mükafatçısı "Qəbələ" Kiprin "Apollon" klubunu qəbul edib.

Bakıda keçiriləcək qarşılaşma "Bakcell arena"da baş tutub.

Səfərdə 1:1 hesablı heç-heçəyə nail olan "Qəbələ" ev oyununa üstünlüklə çıxmışdı. Belə ki, səfərdə qol vuruğu üçün təmsilçimizi 0:0 hesablı heç-heçə də qane edirdi.

Oyuna aktiv başlayan təmsilçimiz çoxsaylı cəhdlərinə baxmayaraq ilk hissədə hesabı aça bilmədi. İkinci hissədə də təzyiqi davam etdirən Roman Qriqorçukun yetirmələri bu dəfə istəyinə çata bildi. İlk oyunun qəhrəmanı Cavid Hüseynov bu dəfə də penaltidən fərqləndi.

İkinci hissə bir neçə epizodda gərginliklə də yadda qaldı. Oyunun sonlarına yaxın "Qəbələ"nin müdafiəçisi Ürfan Abbasov hakimə etiraz etdiyi üçün qırmızı vərəqə ilə cəzalandırıldı. Ancaq bütün bunlara baxmayaraq, təmsilçimiz üstünlüyünü sona qədər qoruya bildi və tarix yazdı.

Avropa Liqası
III təsnifat mərhələsi
Cavab oyunu

"Qəbələ" (Azərbaycan) - "Apollon" (Limassol, Kipr) - 1:0
Qol: Cavid Hüseynov, 80 (pen.)

Baş hakim: Duarte Nunu Pereyra Qomes
Bakı. "Bakcell Arena"
İlk oyun - 1:1