"Qəbələ" turnirin qalibi oldu
"Qəbələ"nin 16 yaşadək futbolçulardan ibarət komandası Qazaxıstanda keçirilən beynəlxalq turnirdə 3-cü - sonuncu oyununu keçirib. Qol.Az-ın klubun rəsmi saytına istinadən verdiyi məlumata görə, "qırmızı-qaralar" həlledici görüşdə Qırğızıstanın "Abdış-Ata" kollektivi ilə qarşılaşıb. İlk iki oyunda böyükhesablı qələbələr qazanan ("Kayrat" 4:1, Almatı şəhər yığması 5:0) Famil Xəlilovun yetirmələri bu dəfə də meydandan 3 xalla ayrılıblar. "Qəbələ" sözügedən qarşılaşmada minimal hesabla qalib gəlib. Elvin İmanlı komandaya qələbə qazandıran yeganə qola imza atıb. Bu nəticə ilə 3 oyunda maksimum - 9 xal qazanan Qəbələ təmsilçisi turnirin qalibi adına sahib olub. Turnirdə ən çox - 5 qola imza atan Elvin İmanlı "ən sərrast futbolçu", qapıda inamlı oyunu ilə seçilən Sərxan Osmanov isə "ən yaxşı qapıçı" adına layiq görülüb və diplomla təltif edilib.