Dəhşətli qəza gündəmə gətirdi – 3 il əvvəl Bakıda qadağan edilib
Bakının Binəqədi rayonu, Biləcəri qəsəbəsində baş verən dəhşətli qəza bir sıra məsələləri aktuallaşdırıb. Xüsusilə yük maşınlarının potensial təhlükə olduğu vurğulanır. Hətta bildirilir ki, əksər belə sürücülərin vəsiqəsi yoxdur.
Səsləndirilən fikirlər nə qədər realdır? Yük maşınları ilə bağlı ciddi təhlükə varmı? Biləcəridəki qəzanın əsas səbəbi nədən qaynaqlanır?
Globalinfo.az-a danışan nəqliyyat eksperti Rauf Ağamirzəyev deyib ki, tikinti materialları xarab olmayan məhsullar olduğuna görə bəzi yüklərin dəmir yolu ilə daşınması daha məqsədəuyğundur:
"Köhnə Keşlə və Bakı yük stansiyalarının şəhərin mərkəzində yerləşməsi yeni imkanlar yaradır. Bundan başqa, paytaxtın yarımdairəvi yolunun tamamlanmaması logistika baxımından müəyyən çətinliklərə səbəb olur. Hazırda logistik mərkəzlər yalnız şəhərin qərb tərəfində yerləşir, bu da daşınmada əlavə fəsadlar doğurur. Şəhərin şimal, şərq və mərkəz hissələrində də logistik mərkəzlərin yaradılması zəruridir. Burada həm ərzaq, həm də tikinti materiallarının müəyyən hissəsinin yığılması təmin olunmalıdır. Həmçinin tonajı 8 tona qədər olan yüklərin daşınması həyata keçirilə bilər.
Qanunvericiliyə əsasən, 2022-ci il 27 oktyabr tarixindən xüsusi təyinatlı, o cümlədən qəza-bərpa və xilasedici nəqliyyat vasitələri istisna olmaqla, kütləsi yüklə birlikdə 8 tondan artıq olan yük avtomobillərinin saat 07:00-dan 22:00-dək, yanacaq daşıyan yük avtomobillərinin isə 06:00-dan 00:00-dək Bakıya girişi və şəhərdaxili hərəkəti qadağan olunub".
Ekspert qeyd edib ki, yüklərin bir çoxunun dəmir yoluna yönləndirilməsi həm təhlükəsizlik, həm də daşımada effektivliyi artırır:
"Yük maşınlarında malların bərabər paylanmasına ciddi nəzarət olunmalı və təhlükəsizlik qaydalarına əməl edilməlidir ki, qəzaların qarşısı alınsın. Həmçinin yük daşımalarına dair qaydaların yenidən nəzərdən keçirilməsi və sürücülərin peşəkarlığı baxımından dünya təcrübəsinin tətbiqi faydalı olardı. Logistik mərkəzlərin yalnız şəhərin qərb tərəfində yığılması hərəkətliliyə mənfi təsir edir. Onlar fərqli nöqtələrdə təşkil olunsaydı, həm yol hərəkətinin intensivliyi balanslaşdırılar, həm də daşımalar daha effektiv həyata keçirilərdi".